Իր դեմ ցուցմունք տվող գրեթե բոլոր վկաներին այսօր այսպես էր հակադարձում Գյումրու ՀԱԿ ակտիվիստներից մեկը` ազատամարտիկ Ժորա Աթոյանը, որը մի քանի ամիս է` դատվում է խարդախություն կատարելու` կեղծ փաստաթղթերով զինվորական կենսաթոշակ, բնակարան ձեռք բերելու ու այսպիսով պետությանը 8 մլն 733 հազար 879 դրամի վնաս պատճառելու մեջ:
Շիրակի մարզի ընդհանուր իրավասության դատարանում դեռ քննվում է այն հարցը, թե Արցախի պատերազմի մասնակից Ժորա Աթոյանը իսկապես կոնտուզիա՞ է ստացել, թե՞ «սիմուլյանտություն» է անում: Այսօր դատարան էին հրավիրվել 8 վկաներ`չորսը պետական մեղադրող Հարություն Հարությունյանի, չորսն էլ Ժորա Աթոյանի միջնորդությամբ:
Դատարանն առաջինը լսեց ՕԵԿ ղեկավար Արթուր Բաղդասարյանի ազգականին` Արթիկի շրջանի Սպանդարյան գյուղի գյուղապետ Վաղինակ Բաղդասարյանին, որը թեև կռվել էր «Մասիսի» գումարտակում, սակայն չէր ճանաչում Ժորա Աթոյանին: Նա պնդում էր, որ իրենց գումարտակում այդպիսի անուն-ազգանունով մարդ չի եղել, որին ի պատասխան ամբաստանյալը տեղից գոռում էր . «Հերիք չէ՞ ստեր փչես ու երգես, եթե մենք իրար չենք հանդիպել Ղարաբաղում, իմ մեղքը ո՞րն է»: Բանը հասավ նրան, որ մեկը մյուսին կոռեկտության դասեր էր տալիս:
Կարդացեք նաև
Սակայն այս վկային դեռ չճանապարհած` մի «կրկես» սկսվեց դատարանում: Պետական մեղադրողի հրավերով դատարան ներկայացավ Նուբարաշենում որպես պահակ աշխատող, բաքվեցի Վյաչեսլավ Ներսիսյանը, ով բացարձակապես հայերեն չէր հասկանում: Վերջինս ասաց, որ ինքը եղել է Հակոբ կամարի բարձրունքներում, սակայն մարտի դաշտում ֆուտբոլ է խաղացել, հանգիստ անցկացրել: Դատավոր Մարտին Սարոյանի այն հարցին, թե ճանաչու՞մ է իրենց գումարտակում եղած գյումրեցիներին, վկան տեղեկացրեց, որ իրենց գումարտակից գյումրեցիները փախել են, որն էլ հարուցեց դատին մասնակցող ՀԱԿ- ակտիվիստների զայրույթը: Վերջիննես մի մարդու պես դուրս եկան դատարանի դահլիճից` դատախազին մեղադրելով կռված տղաների անունը վարկաբեկելու, դատը շուոի վերածելու մեջ:
Գյումրու ՀԱԿ համակարգող Աշոտ Զաքարյանը ասաց դատախազին. «Սա հաստատ պատվեր է, էս կարգի մարդկանց բերել եք կռված տղեքին փչացնելու համա՞ր, հա՞»: Մեկ այլ ընդդիմադիր էլ սրտնեղեց, թե գնդակ զարկողին կռված մարդու տեղ բերում, կեղծ ցուցմունքներ եք կորզո՞ւմ: Ժորա Աթոյանի շահերը պաշտպանող փաստաբան Աննա Դավթյանն էլ այդ վկայից հետաքրքվեց, թե նա ի՞նչ էր անում կռվի դաշտում` ո՞ր գումարտակում է եղել, ո՞ր թվականին: Վկան բորբոքվեց, թե «ինձ նառիժատ է անում»: «Ի՞նչ արի, որ նառիժատ արի, հարցնում եմ, որովհետեւ հրամանագրքի մեջ չկա նրա անուն-ազգանունը որպես պատերազմի մասնակցի»,-մեկնաբանեց փաստաբանը:
Այնուհետ վկայություն տվեցին Ժորա Աթոյանի հրավիրած վկաները, որոնք միաբերան պնդում էին, որ իրենք ականտես են եղել, թե ինչպես է Աթոյանը ականի պայթյունից վիրավորվել Հակոբ Կամարի բարձրունքներում: Հետաքրքիրն այն է , որ Ժորա Աթոյանի միջնորդությամբ որպես վկա հրավիրվել էր նաև հենասալյակով շարժվող Լյովա Հարությունյանը, որի դեմ նույնպես քրեական գործ է հարուցված փաստաթղթեր կեղծելու ու զինվորական թոշակ ստանալու համար:
Նունե ԱՐԵՎՇԱՏՅԱՆ
