«Ժառանգություն» կուսակցության 7-րդ համագումարի պատվիրակներն ընդգծված ջերմությամբ ողջունեցին «Ազատ դեմոկրատներ» կուսակցության ղեկավար Խաչատուր Քոքոբելյանին։ Վերջինս իր ելույթում հայտարարեց, թե ինքն իր ընկերների հետ եկել է համագումարին՝ հաստատելու համար այն իրողությունը, որ «Ազատ դեմոկրատները» «Ժառանգության» հետ երկար ճանապարհ ունեն անցնելու։ Նրա ասելով, Հայաստանը մտնում է մի նոր փուլ որը սկսվելու է այս ԱԺ ընտրարշավով եւ ավարտվելու է շատ ուշ՝ նախագահական ընտրություններով։ «Առաջին անգամ Հայաստանում ստեղծվել է մի իրողություն, երբ ԱԺ ընտրությունները բացի այն, որ հերթական ընտրություններ են, այլեւ պատմական նշանակություն ունեն այն իմաստով, որ կարող են հող ստեղծել Հայաստանը նոր ուղղությամբ տանելու համար»: Քոքոբելյանը հավելեց, թե ԱԺ-ին հաջորդող նախագահական ընտրություններով է որոշվելու ՀՀ ուղին։
Նրա ասելով, «Ժառանգությունն» ի վիճակի եղավ անցած հինգ տարիներին քաղաքական եւ արժեհամակարգային նոր մշակույթ ներմուծել քաղաքական դաշտ եւ ի զորու եղավ գտնվելու պայքարի ուղիղ կենտրոնում։ Նրանք, ովքեր ցանկանում են նսեմացնել «Ժառանգության» դերն ու նշանակությունը մեր քաղաքական դաշտում, ըստ Քոքոբելյանի, դա անում են չարակամությունից, որովհետեւ կան ցցուն փաստեր, որոնք ապացուցում են «Ժառանգության» հավատարմությունը ժողովրդավարությանն ու Հայաստանի Հանրապետությանը։
«Ազատ դեմոկրատների» ղեկավարը նաեւ ասաց, թե բոլոր այն քաղաքական ուժերը, որոնք մտահոգ են Հայաստանի ապագայով, պետք է իրենց մեջ քաղաքական կամք, իմաստություն գտնեն եւ առանց որեւէ ամբիցիաների միասնական գործելու եւ 10-15 տարվա կտրվածքով ուղենշելու այն ապագան, որ տեսնում են Հայաստանի համար, եւ չբավարարվեն միայն ԱԺ մտնելով ու ելույթներով։
Կարդացեք նաև
Քոքոբելյանը նաեւ պատրաստակամություն հայտնեց լիարժեք համագործակցություն հաստատել ոչ միայն «Ժառանգության», այլեւ քաղաքական այն ուժերի հետ, որոնց համար թիվ մեկ խնդիրը ՀՀ-ում ազատ ընտրություններ անցկացնելն է։
Նաիրա ՄԱՄԻԿՈՆՅԱՆ
