«Ժառանգության» առաջնորդ Րաֆֆի Հովհաննիսյանը կուսակցության համագումարում հնչեցրած իր ելույթում անդրադարձավ իշխանությունների կողմից 100 տոկոսանոց համամասնական համակարգի անցնելը որպես հակասահմանադրական որակելուն եւ այդ ֆոնին՝ Ընտրական օրենսգրքով սահմանված այն դրույթին, ըստ որի՝ Հայաստանից դուրս գտնվող ՀՀ քաղաքացիները զրկված են լինելու ընտրական իրենց իրավունքից, իսկ ահա դիվանագետները կարող են քվեարկել էլեկտրոնային փոստով։ «Մարդը կամ քաղաքացի է կամ քաղաքացի չէ, իսկ ի՞նչ է նշանակում եւ ինչպիսի արհամարհանք սեփական Սահմանադրության եւ ինքնիշխանության հանդեպ, երբ օտար երկրներում գտնվող քաղաքացին չի կարող իրացնել իր իրավունքը, այցելել ՀՀ դեսպանատուն, որը ՀՀ ինքնիշխան տարածքն է եւ քվեարկել այնտեղ։ Ո՞վ է խոսում հակասահմանադրական նախաձեռնության կամ սահմանափակումների մասին։ Սա ի՞նչ խտրականություն է։ Մենք բոլորս գիտենք, թե այդ հարյուր հազարավոր չքվեարկողների քվեները ինչի համար են օգտագործվելու հետո»,– հայտարարեց Րաֆֆի Հովհաննիսյանը։
Նաիրա ՄԱՄԻԿՈՆՅԱՆ
