Դեռ փետրվարի 29-ին ոստիկանության Նոր Նորքի բաժնի աշխատակիցներն համայնքի տարածքում ապօրինի պահվող զենք-զինամթերքի աննախադեպ զինանոց էին հայտնաբերել: Ոստիկաններն իրացնելով ստացված օպերատիվ տեղեկությունները, խուզարկություն էին կատարել 47-ամյա Արշավիր Կարապետյանին պատկանող, Մոլդովական փողոցի 12 հասցեում գտնվող կաթսայատանը կից շինությունում եւ հայտնաբերել էին ապօրինի պահվող աննախադեպ զինանոց: Երեկ պարզվեց, որ Արշավիր Կարապետյանը, բացի ղարաբաղյան պատերազմի մասնակից լինելուց նաեւ ՀՅԴ անդամ է:
Լրատվամիջոցներն այս առիթով անմիջապես հիշեցին, որ այս զինանոցը հայտնաբերելուց օրեր առաջ ՀՅԴ Բյուրոյի ներկայացուցիչ Հրանտ Մարգարյանը հայտարարել էր, թե Դաշնակցությունն իշխանություններին ազատ ընտրություններ պարտադրելու նպատակով կամավորներ է հավաքագրում, եւ ենթադրել, թե հնարավոր է, որ սա քաղաքական ենթատեքստ ունեցող «բացահայտում» է, եւ որ իշխանությունները փորձում են ՀՅԴ-ին զսպել ճիշտ այն մեթոդներով, ինչպես կարողացան դա անել ԲՀԿ-ի դեպքում` այդ կուսակցության ներկայացուցիչներին եւ Գագիկ Ծառուկյանին մոտ կանգնած մարդկանց կալանավորելով:
Aravot.am-ի հարցին` արդյոք կուսակցության անդամի ձերբակալությունը քաղաքական ենթատեքստ ունի, ՀՅԴ ԳՄ անդամ Սպարտակ Սեյրանյանը պատասխանեց. «Մենք այս պահին որեւէ բնույթի եզրակացություն, հայտարարություն, ենթադրություն անելու հիմք չունենք»: Մեր ճշտող հարցին` չունեք, որովհետեւ չեք ենթադրում կամ չեք կարծում, որ դա կարող է քաղաքական ենթատեքստ ունենա՞լ, թե՞ դեռ քննարկում, ուսումնասիրում եք վիճակը, Սեյրանյանն արձագանքեց` ասելով, թե ենթադրելու, կասկածելու բան էլ չկա, ենթադրելու կամ կասկածելու համար պետք է հիմք ունենալ: Այսուհանդերձ, դաշնակցական գործիչն ասաց, թե քրեական գործ է հարուցվել, նախաքննությունն է ընթանում, եւ դեռ պետք է հասկանալ, թե ընդհանրապես ինչ է կատարվում:
Կարդացեք նաև
