Գարնան առաջին օրը Իջեւանի քաղաքային զբոսայգում, Տավուշի մարզպետարանից 50 մ հեռավորության վրա, աղտոտված էին խորհրդային տարիներին իջեւանյան քանդակի սիմպոզիումների ընթացքում կերտված 2 քանդակ, նաեւ մի նստարան: Նստարանն ապականված էր փչվող փրփուրով, փրփուրով աղտոտված էին նաեւ 2 քանդակներ:
Քանդակներից մեկի վրա (որի հեղինակն է թուրքմեն քանդակագործ Ջմուդուրդան) դրված էր մետաղյա ջարդված աթոռ: Իսկ արձանի կողքին օղու եւ կոնյակի դատարկ շշերով ցելոֆանե փաթեթ էր: Քանդակված կնոջ բերանին խոշոր քարակտոր կար դրված: Հավանաբար, այս ամենը ինչ-որ «մեսիջ է»:
Դեպքի վայրում եղան Իջեւանի քաղաքապետ Վարդան Ղալումյանը, Իջեւանի Շահերի պաշտպանության եւ աջակցության կենտրոնի տնօրեն Վահագն Թամրազյանը, Տավուշի մարզպետարանի աշխատակիցներ:
Կարդացեք նաև
Քաղաքային զբոսայգու պահակ Հրաչիկ Ավետիսյանն ասաց, որ այդ բարբարոսությունն արվել է գիշերով, ու դա կատարվել է «ինադու»:
Իջեւանի քաղաքային կոմունալ ծառայության բանվոր Ռազմիկ Բախչագյուլյանը կատարվածը համարեց «թշնամություն»: Նրա խոսքերով` նախօրեին քաղաքապետ Վարդան Ղալումյանի գլխավորությամբ իրենք 17 արծաթափայլ եղեւնի են տնկել քաղաքի Ազատամարտիկների հրապարակում, եւ զբոսայգում կատարվածը կապ ունի այդ ծառատունկի հետ:
– Հո չենք կարող տնկված ամեն եղեւնու մոտ պահակ դնել, որ գիշերը չջարդեն, -ասաց Ռազմիկ Բախչագյուլյանը:
Հավելենք, որ Իջեւանի զբոսայգում նախկինում էլ են եղել վանդալիզմի դեպքեր:
Ոսկան ՍԱՐԳՍՅԱՆ
