Գարունը, զարթոնքը, լույսը, թարմությունը…Դու, մաշկդ, արտաքինդ, առողջությունդ, ինքնազգացողությունդ…Դու և մարմինդ, զարթոնք չեք ապրում:Գարնանային զբոսանքների ծրագրեր ես կազմում ու մեկ էլ նկատում, որ մաշկդ անհարթ է, չոր կամ թեփոտված,տեղ-տեղ թարախակույտեր ու մուգ բծեր են հայտնվել, իսկ նախկին ձյունաճերմակ ժպիտդ էլ այն չէ: Էլ ի՞նչ զբոսանք…
«Տարվա բոլոր եղանակներին մաշկս փայլուն է ու հարթ, իսկ այս ժամանակաշրջանում բշտիկներն ինձնից անպակաս են»,- ասում է 24-ամյա Աննա Միքայելյանը:
Ըստ մաշկաբան Նարինե Գրիգորյանի`մաշկային խնդիրների առաջացման պատճառ կարող են լինել ջերմաստիճանի տատանումը, սեզոնային փոփոխությունն ու օրգանիզմին անհրաժեշտ վիտամինների պակասը:
«Գարնանը մաշկը անկենդան է դառնում, նրան պետք է թույլ տալ, որ շնչի»,-բացատրում է Նարինե Գրիգորյանն ու խորհուրդ տալիս.
«Գարնան սկզբին սննդակարգում պետք է ներառել շատ բանջարեղեն, մասնավորապես լոլիկ, գազար և բազուկ, ինչպես նաև՝ ձավարեղեն ու ընկուզեղեն:
Կոսմետոլոգ Լիանա Թևոսյանն էլ իր հերթին խորհուրդ է տալիս տնային պայմաններում փորձել մաշկի տոնուսը բարձրացնող հետևյալ դիմակը ինչպես դեմքի, այնպես մարմնի բոլոր հատվածների համար.
«Կիտրոնի հյութը քսե՛ք մարմնի տվյալ հատվածին և սպասեք 10 րոպե: Նախընտրելի է՝ պրոցեդուրայից հետո լոգանք ընդունելը մաքսիմալ արդյունքի հասնելու համար: Դիմակը հակացուցված է ալերգիկներին»:
Գարնանը առանձնահատուկ ուշադիր պետք է լինել ատամների և լնդերի նկատմամբ: Արնահոսությունների հավանականությունը այս շրջանում համեմեմատաբար մեծ է: Ատամներին վերաբերող այս և նմանատիպ այլ խնդիրներից խուսափելու համար, ըստ ատամնաբույժ Կարեն Սարբեկյանի, անհրաժեշտ է օգտագործել ընդեղեն և հնդկահավի միս:
Ցանկալի արտաքինը լավ տրամադրության, հաճելի ինքնազգացողության կարևոր բաղադրատարրերից է :
Այ ցանկալի արտաքինով ու բարձր տրամադրությամբ էլ դիմավորի՛ր գարունը. այն արդեն թակում է դուռդ:
Արմինե Հովհաննիսյան
