Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մխիթար Պապոյանը քիչ առաջ հրապարակեց ՀՀ Ճանապարհային ոստիկանության նախկին պետ Մարգար Օհանյանի, սպայական գնդի հրամանատար Ստեփան Կարախանյանի, տեխնիկ Սամվել Մախմուրյանի եւ ՃՈ տնտեսական բաժնի պատասխանատու Արա Լեւոնյանի դեմ հարուցված քրեական գործով դատական նիստը հետաձգելու մասին որոշումը:
Դատարանը ստացել էր Ստեփան Կարախանյանի պաշտպան Լիանա Գրիգորյանի գրությունը, որով հայտնվում էր, թե հիվանդ է, եւ խնդրում էր հետաձգել դատական նիստը: Դատարանը գտավ, որ անհարգելի է պաշտպանի բացակայությունը, քանի որ հիվանդությունը հաստատող փաստաթղթեր չի ներկայացվել: Մեղադրյալ Ստեփան Կարախանյանն էլ ասաց, որ առավոտյան է իմացել իր պաշտպանի անկողնում գտնվելու եւ ջերմելու մասին: Բայց քանի որ առանց պաշտպանի հնարավոր չէր շարունակել դատական նիստը, այն հետաձգվեց մինչեւ մարտի 13-ը:
Հիշեցնենք, որ այսօր սպասվում էր մեղադրող Հարություն Հարությունյանի մեղադրական ճառը:
Ռուզան ՄԻՆԱՍՅԱՆ
