Պարբերական, ժողովրդի լեզվով ասած՝ երեւանյան հիվանդությունը թեեւ ամբողջ աշխարհում դասվում է հազվադեպ հիվանդությունների շարքին, սակայն այն Հայաստանում շատ տարածված է: Երեկ «Նովոստի-Արմենիա» մամուլի ակումբում հազվադեպ հիվանդությունների խնդիրների վերաբերյալ տեսակամուրջ էր կազմակերպվել, որին մասնակցում էր Մոսկվան, Քիշնեւը, Կիեւը, Աստանան եւ Երեւանը: Բժշկական գենետիկայի եւ առողջության առաջնային պահպանման կենտրոնի տնօրեն Թամարա Սարգսյանի ներկայացմամբ՝ ամեն շաբաթ 60-80 նոր մարդիկ են հետազոտվում իրենց կենտրոնում եւ հիմնականում՝ երեխաներ. «Քանի որ սա գենետիկ հիվանդություն է, մեզ դիմում են ընտանիքներ, որտեղ հիվանդության դեպքեր են եղել: Հետազոտվողների կեսից ավելիի մոտ հաստատվում է պարբերական հիվանդությունը: Ճիշտ է, մինչեւ 7 տարեկան երեխաների հետազոտությունն ու բուժումը կատարվում է պետպատվերի շրջանակում, բայց ընդհանուր առմամբ՝ բուժումը թանկ արժե»: Բժշկի խոսքերով՝ աշխարհում գրանցված է հազվադեպ հիվանդությունների 6-7 հազար տեսակ, որոնց թվում են հեմոֆիլիան, մտավոր հետամնացության գենետիկական ձեւերը, ֆենիլկետոնուրիան եւ այլ հիվանդություններ: Թե ինչ տվեց տեսակամուրջը եւ համեմատվելով այլ երկրների հետ՝ Հայաստանն այդ առումով ի՞նչ վիճակում է՝ մեր հարցին Թամարա Սարգսյանն ասաց, որ ԱՊՀ երկրների հետ նման շփումն առաջին անգամ էր, եւ բավականին տեղեկություններ ստացան. «Ես իրավունք չունեմ ասել, թե մենք ավելի լավ վիճակում ենք հետազոտության կամ բուժման առումով, մի քիչ համեստություն անեմ, բայց պետք է նշեմ, որ Հայաստանում կա լուրջ առաջընթաց»:
ՆԵԼԼԻ ԲԱԲԱՅԱՆ
«Առավոտ» օրաթերթ
