Լուսանկարը՝ Panarmenian-ի
Ընտրություններում Հանրապետական կուսակցության քարոզարշավներում հանդես եկող երգչուհի Շուշան Պետրոսյանն այս տարի մասնակցության առաջարկություն չի ստացել, իսկ եթե ստանա՝ անպայման կընդունի: Այս մասին Aravot.am-ին ասաց երգչուհին. «Յուրաքանչյուր քաղաքացի իրավունք ունի կատարել իր ընտրությունն ու իր մասնագիտական ճյուղով աջակցի իր նախընտրած ճանապարհը: Դա քաղաքականացվել չէ: Եթե ես երգում եմ ի պաշտպանություն ինչ–որ ուղղության՝ ես չեմ դառնում քաղաքական գործիչ»:
Շուշան Պետրոսյանը չի հասկանում այն երգիչ-երգչուհիներին, որոնք երգում են մի կուսակցության համար, որի գաղափարախոսությունը չեն կիսում. «Այ դա չեմ հասկանում: Ունեցել եմ նման մի փորձ. ինձ ասացին, որ պիտի երգեմ այսինչ երգը, գնացի ստուդիա, պարզվեց, որ դա բոլորվին այլ կուսակցության համար գրվող հիմն էր: Ասացի՝ երգի խնդիր չունեմ, կարող եմ երգել, բայց դուք ինձ ստել եք» :
Երգչուհու խոսքերով, կարելի է նաեւ չկիսել տվյալ կուսակցության գաղափարախոսությունը, բայց ամենակարեւորը չպետք է հանդես գալ անդեմ. «Կարելի է նաեւ չկիսել, բայց եթե մի տեղ երգում ես, մնա էդտեղ, բոլոր դեպքերում չարժե երգել մեկ այս մեկ այն կուսակցության համար»:
Կարդացեք նաև
Երգչուհուց հետաքրքրվեցինք՝ Հանրապետական կուսակցության քարոզարշավներում իր հանդես գալը նշանակում է, որ ինքը կիսո՞ւմ է ՀՀԿ-ի գաղափարախոսությունը. «Ես Նժդեհի գաղափարախոսությունն եմ կիսում: Ես Նժդեհին սիրում եմ ու այնպես չէ, որ Հանրապետական կուսակցության հանդես գալուց հետո եմ սիրում»:
Ինչ վերաբերում է դերասան Սերգեյ Դանիելյանի կոչերին, թե արվեստագետները պետք է հեռու մնան քաղաքականությունից ու չընդգրկվեն կուսակցությունների քարոզարշավներում, որովհետեւ , ինչպես դերասանն էր ասել, քաղաքական գործիչը զուգարանի թղթի պես մի բան է՝ օգտագործեցիր՝ գնաց, Շ. Պետրոսյանը նկատեց. «Ես կարծում եմ, որ տաղանդավոր դերասան Սերյոժը պիտի իր արվեստին հավասարազոր հայերենով արտահայտվի: Ի վերջո կարելի է ընդունել, չընդունել, չսիրել, ատել, բայց ամեն ինչ պետք է անել բարեկիրթ: Արտիստը, որը ներկայացնում է մշակույթ, ամեն ինչ պետք է ավելի գեղեցիկ արտահայտվի»:
Երգչուհին չի կարծում՝ արվեստագետի վարկանիշը կարող է ընկնել այս կամ այն քաղաքական ուժին սատարելով. «Չեմ կարծում, որ կարժեզրկվեն, եթե ունեն դիրքորոշում: Այսօր աղաղակում են դեմոկրատիա ու բռնանում քո ցանկությանը: Էլ ո՞րն է դեմոկրատիա, եթե բռնանում ես իմ նախընտրության վրա»:
Արփինե ՍԻՄՈՆՅԱՆ
