«Եվրամիության «առավել գործուն դերակատարության» մասին, ինչպես գիտենք, ավելի հաճախ եւ բավական պաթետիկ խոսում էին Բաքվում: Այս իմաստով «Հարավային Կովկասին վերաբերող եզրակացություններ» անվանված նախագծի` Լեռնային Ղարաբաղի մասին հատվածը, դատելով առաջին տպավորությամբ, Ադրբեջանի հույսերը չի արդարացնում»,-Aravot.am-ի խնդրանքով անդրադառնալով ԵՄ արտաքին գործերի խորհրդի` Հայաստանի, Վրաստանի եւ Ադրբեջանի վերաբերյալ ընդունած հատուկ փաստաթղթին, կարծիք հայտնեց ԼՂՀ ԱԺ արտաքին հարաբերությունների հանձնաժողովի նախագահ Վահրամ Աթանեսյանը:
«Այնտեղ հստակ արձանագրված է, որ ԵՄ–ն «իր աջակցությունն է հայտնում ԵԱՀԿ Մինսկի խմբին», մինչդեռ նույն օրը Ադրբեջանի կառավարող կուսակցության բարձրաստիճան պաշտոնյան ասել է, թե «Մինսկի խումբը պետք է խնդրի կարգավորման հստակ ժամանակային շրջանակներ սահմանի»: Սա ՄԽ համանախագահների` սպասվող տարածաշրջանային այցից առաջ միջնորդների վրա ճնշում գործադրելու անթաքույց դրսեւորում է: Ուրեմն կարելի է եզրակացնել, որ ԵՄ արտաքին գործերի խորհրդի մակարդակով քննարկված նախագիծը Բաքվում, մեղմ ասած, չեն ողջունում»,- ասաց մեր զրուցակիցը:
Պարոն Աթանեսյանի կարծիքով, էական է նաեւ, որ նախագծում խոսվում է Լեռնային Ղարաբաղ ԵՄ ներկայացուցիչների առանց նախապայմանների մուտքի մասին. «Ակնարկը միանշանակորեն հասցեագրված է Ադրբեջանին: Քանի որ թե Հայաստանը, թե Լեռնային Ղարաբաղն, ընդհակառակը, մշտապես հանդես են եկել եւ հանդես են գալիս Հարավային Կովկասում ԵՄ հատուկ ներկայացուցչի կողմից ԼՂ այցելելու օգտին: Հարկ է հիշեցնել, որ հենց ադրբեջանական կողմի ոչ կառուցողական մոտեցման պատճառով էր, որ ԵՄ նախկին հատուկ ներկայացուցիչը մի քանի տարի առաջ կես ճանապարհից հրաժարվեց ԼՂ այցելելու մտքից: Այսօր ԵՄ–ն ինքն է խնդիր դնում, որպեսզի իր ներկայացուցիչներն առանց նախապայմանի այցելեն Լեռնային Ղարաբաղ: Դա ԵՄ– Ադրբեջան մակարդակի քննարկման հարց էր, բայց փոփոխվող իրավիճակում, թվում է՝ Լեռնային Ղարաբաղն էլ պետք է ուսումնասիրի ԼՂ ԵՄ ներկայացուցիչների մուտքի եւ այստեղ գործելու նպատակահարմարությունը կամ ոչ նպատակահարմարությունը: Մանավանդ որ, ԵՄ նախագծում ինձ արտառոց է պատկերվում « մարդրիդյան սկզբունքների» հիշատակումը: Թվում է, որ դա անցած փուլ է եւ գրեթե անհնար է «վերակենդանացնել» մի գործընթաց, որ Իլհամ Ալիեւը մեծ «հաջողությամբ» կասեցրեց անցյալ տարի` Կազանի եռակողմ հանդիպմանը: Իմ ընկալմամբ, դա նաեւ Դմիտրի Մեդվեդեւի միջնորդական առաքելության «թաղումն» էր, ուստի տարօրինակ է, որ եվրաչինովնիկներն այդ նախագծում աջակցություն են հայտնել նաեւ պաշտոնից այսօր–վաղը հեռացող Մեդվեդեւի միջնորդությանը:
Գուցե հարկ կար ասել` «Ռուսաստանի միջնորդությամբ եռակողմ հանդիպումներին» է ԵՄ–ն աջակցում: Մի խոսքով, այս եւ «մադրիդյան սկզբունքների» մասով նախագիծը գործնականությամբ աչքի չի ընկնում: Սա իմ անձնական ընկալումն է»,- եզրափակեց Վահրամ Աթանեսյանը:
Ըստ մեր զրուցակցի, Եվրամիությունը պատրաստ է Հայաստանի եւ Ադրբեջանի միջեւ փոխադարձ վստահության ամրապնդմանն ուղղված միջոցներ ձեռնարկել եւ այդպես նպաստել ԵԱՀԿ-ի Մինսկի խմբի առաքելությանը: Պարոն Աթանեսյանը դրանով է բացատրում այն, որ Եվրամիությունը ցանկանում է, մասնավորապես, իր ներկայացուցիչների համար ստանալ Լեռնային Ղարաբաղ եւ հարակից շրջաններ առանց նախապայմանների մուտք գործելու հնարավորություն։
Նելլի ԳՐԻԳՈՐՅԱՆ
