Այսօր Հայաստանում Իտալիայի դեսպանությունում կայացավ «Նեապոլի Սուրբ Գրիգոր Լուսավորիչ հայկական եկեղեցի» հայերեն-իտալերեն կատալոգի շնորհանդեսը: Այն ՀՀ մշակույթի նախարարության եւ Հայաստանում Իտալիայի դեսպանության համագործակցության արդյունքն է: Գիրքն առաջին անգամ ներկայացվել է անցյալ տարվա դեկտեմբերի 14-ին՝ Վենետիկում բացված «Հայաստան. քաղաքակրթության դրոշմներ» խորագրով ցուցահանդեսի շրջանակներում:
Կատալոգում զետեղված են Նեապոլի Սբ. Գրիգոր Լուսավորիչ հայկական եկեղեցում գտնվող 17-րդ դարի իտալացի հայտնի նկարիչ Լուկա Ջորդանոյի կողմից ստեղծված որմնանկարների լուսանկարներ: Որմնանկարների լուսանկարչական ցուցահանդեսը «Իտալերենի համաշխարհային 10-րդ շաբաթվա» շրջանակներում կայացել է անցյալ տարվա հոկտեմբերին` Հայաստանում Իտալիայի դեսպանությունում:
Հայաստանում Իտալիայի դեսպան Բրունո Սկապինին կարեւորեց կատալոգի լույսընծայումը, ասելով, որ նախագիծը փոքր է չափով, բայց մեծ՝ նշանակությամբ: Դեսպանը նշեց, որ թյուր է տպավորությունը, թե Իտալիայում հայկական հետքերը տանում են միայն սուրբ Ղազար, ինքն ամեն օր հայերի մասին նոր վկայություն ու հետք է գտնում: Դրանցից մեկն էլ Նեապոլի Սուրբ Գրիգոր լուսավորիչ եկեղեցին է, որտեղ, դեսպանի ասելով, պահվում են սուրբ Գրիգորի մասունքները, որոնք Նեապոլ են հասել հայ մայրապետերի շնորհիվ:
Կարդացեք նաև
Հայ մշակույթի ու հոգեւոր գանձերի մասին խոսելիս պարոն Սկապինին ասաց, որ որոշակիորեն ծանոթ է հայ գրականությանը, մասնավորապես Չարենցի պոեզիային: Ափսոսում է, որ լեզվի չիմացության պատճառով հայ հեղինակներին չի կարող բնագրով կարդալ: Նա տպավորված է հայերի՝ մշակույթի հանդեպ հակվածությամբ: Դեսպանի ձեւակերպմամբ, դա ուժի այն կենտրոնն է, որի վրա հիմնվում են հայ-իտալական հարաբերությունները:
Գոհար ՀԱԿՈԲՅԱՆ
