Այսօր ոստիկանությունում «կլոր սեղան» քննարկում է ընթանում այն հարցի շուրջ, թե ինչքանով են հավաքների ժամանակ ոստիկանների գործողությունները իրավաչափ: Քննարկմանը մասնակցելու էին եկել մի շարք հ/կ-ներ, ինչպես նաեւ ԵԱՀԿ երեւանյան գրասենյակի ներկայացուցիչներ: Սակայն լրագրողներին թույլ չտվեցին ներս մտնել ու լուսաբանել քննարկումը:
Ոստիկանությունում մեզ ասացին, որ «դուք հրավիրված չեք»: Մեր դիտարկմանը, որ սա հանրային բաց քննարկում է, հակառակ դեպքում տարածած հայտարարության մեջ նշված կլիներ, որ այն փակ է եւ լուսաբանման համար չէ` ոստիկանները պատասխանեցին, որ «հայտարարությունը միայն հ/կ–ներին է վերաբերում»:
Ավելի ուշ` դրսում մեզ հորդորեցին լրատվության բաժնի պետ Աշոտ Ահարոնյանից բացատրություն ստանալ, թե ինչու ԶԼՄ-ները հանրության մաս չեն կազմում եւ ինչու է արգելվում մեզ լուսաբանել այդ քննարկումը: Աշոտ Ահարոնյանը տեղեկացրեց, որ մենք` լրագրողներս, կխանգարենք քննարկմանը. «Թողեք մենք որոշենք մեր լրատվական քաղաքականությունը: Մենք որոշել ենք, որ այդ քննարկման համար մենք կտանք պարզաբանում, այն կդրվի մեր կայքում, տեսագրություն էլ եթե ուզում եք, շատ կարճ տեսագրություն, որտեղ ֆիքսում է ամեն ինչ` կտանք»:
Մեր հարցին` այնտեղ ինչ-որ փակ բա՞ն է տեղի ունենալու, որ մենք չպիտի տեսնենք, պարոն Ահարոնյանը պատասխանեց. «Փակ չի, բայց չեմ կարծում, որ հանրապետությունում ինչ կատարվում է՝ լրատվամիջոցներին կանչում են: Մենք ենք որոշում ֆորմատը: Լրատվամիջոցները ի՞նչ պիտի անեին»: Aravot.am-ի դիտարկմանը, որ հանրությանը պետք է տայինք տեղեկատվություն` պարոն Ահարոնյանը պատասխանեց. «Մենք պաշտոնական տեղեկատվություն կտանք հանրությանը»:
Կարդացեք նաև
Մեր դժգոհությանը, որ ստացվում է` դուք հանրությանն ասում եք, որ կարդան «02» շաբաթաթերթ ու այնտեղից տեղեկանան` Աշոտ Ահարոնյանն ասաց. «Թողեք դա մենք որոշենք»:
Հռիփսիմե ՋԵԲԵՋՅԱՆ
