«Արմենպրեսի» նախկին տնօրեն, Հայաստանում ճանաչված լրագրող Տիգրան Հակոբյանը, որը մեղադրվում է խոշոր չափի յուրացումներ կատարելու համար և այժմ կալանքի տակ է, վատառողջ է: Այդ մասին Panorama.am-ի թղթակցի հետ զրույցում տեղեկացրեց Հակոբյանի փաստաբան Հայկ Ալումյանը: «Նա սրտի հետ կապված լուրջ խնդիրներ ունի, մեկ անգամ վիրահատություն է տարել և հիմա փորձում ենք այնպես անել, որ համապատասխան մասնագետները զննեն նրան», -փոխանցեց Ալումյանը:
Ավելի վաղ Panorama.am-ին տված հարցազրույցում փաստաբանն ասել էր, որ Տիգրան Հակոբյանի պաշտպանական կողմը «մեծածավալ փաստաթուղթ» է ներկայացրել նախաքննական մարմին, որտեղ ներկայացված է` երբ, ինչի համար և ինչպես է ծախսվել գումարը, որը վատնելու համար էլ նա մեղադրվում է: Այդ մասով, մեզ հետ զրույցում Ալումյանն ասաց, որ դեռ նորություն չկա, և փաստաթուղթը քննության փուլում է:
Նշենք, որ Տիգրան Հակոբյանը հասարակայնության հետ կապերի կառավարման ոլորտի ճանաչված մասնագետներից է, նախկինում զբաղեցրել է «Հայք» թերթի գլխավոր խմբագրի, Հայաստանի Հեռուստառադիոպետկոմի նախագահի, Արմենպրեսի տնօրենի պաշտոնները: Նա մեղադրվում է ավելի քան 184 մլն դրամ հափշտակելու, յուրացնելու մեջ, նրանց մեղադրանք է առաջադրվել Քրեական օրենսգրքի 179 հոդվածի 3-րդ մասի 1-ին կետի «խոշոր չափերով յուրացնելը կամ վատնելը» հատկանիշներով: Տիգրան Հակոբյանի հետ միասին նույն մեղադրանքն է առաջադրվել նաև Հայ Ազգային կոնգրեսի առաջնորդի մամլո խոսնակ Արման Մուսինյանի եղբորը՝ Վահան Մուսինյանին, որը այժմ հետախուզման մեջ է:
Panorama.am
