Այսօր «Հայելի» ակումբում տեղի ունեցավ «Բնապահպանական խնդիրները եւ բլոգերի սատանիստական հայտարարությունները, արձագանք՝ արձագանքին՚ թեմայով բանավեճ-քննարկում, որին մասնակցում էին Գրականության ինստիտուտի փոխտնօրեն Վարդան Դեւրիկյանը, բանաստեղծուհի Մարինե Պետրոսյանը եւ բլոգեր, ազատ լրագրող Բայանդուր Պողոսյանը:
Վերջինիս Աստծո դեմ արված հայտարարությունները տեղիք տվեցին թեժ քննարկումների:
ՙՍատանան հրաժարվեց խոնարհվել Աստծո առաջ եւ ես մարդ եմ, որը նույնպես հրաժարվում է խոնարհվել ցանկացած Աստծո առաջ: Շատերը այդ ուղղությամբ աղմուկ են բարձրացնում, եւ ինձ անվերջ դատապարտում, ես ընդհանրապես պաշտամունքից զուտ անձնավորություն եմ: Չարի մարմնացումը սատանան չէ, Աստված էր, ով սպանեց 2 միլիոն մարդու, նկատի ունեմ ջրհեղեղը, որի մասին շատերը մոռանում են: Այնպես որ, գայլի անունը դուրս եկավ, աղվեսը աշխարհը քանդեց: Ես իմ գաղափարը չեմ թաքցնում, ես ՀՀ քաղաքացի եմ եւ պաշտպանում եմ Մաշտոցի այգին, իսկ դուք իրավունք չունեք ինձ անվանել անգրագետ, եթե այստեղ անգրագետ մարդ կա, ապա դա դուք եք, պարոն Դեւրիկյան՚,- Գրականության ինստիտուտի փոխտնօրենին ասաց Բայանդուրը:
Ի պատասխան բլոգերի խոսքերի՝ Վարդան Դեւրիկյանը նշեց.
Կարդացեք նաև
ՙՁեր ասածներն են անգրագիտություն, կա՞ արդյոք այնպիսի ժողովուրդ, որ ընդունի սատանային, որպես բարի կերպար: Մաշտոցի այգի գալիս եւ պայքարում են անկախ գաղափարի, շահի, մասնագիտության , պաշտոնի տեր անձինք, ես դե՛մ չեմ, ուղղակի մեր հասարակությունը պատկերացնո՞ւմ եք, թե ինչպես կընդունի այս նախընտրական շրջանում իրեն սատանիստ հայտարարող մարդուն: Նախընտրական շրջանում ձեր նմանները փորձում են ձայներ որսալ՚:
Պարոն Դեւրիկյանը մոլորյալ անվանեց Բայանդուր Պողոսյանին ու ասաց, որ նրա պարագայում կա փրկություն, իսկ Մարինե Պետրոսյանի դեպքում՝ ոչ: Պատճառն էլ այն էր, որ բանաստեղծուհին Բայանդուրի մասին ասել էր, թե նա ոճրագործություն չի անում, եւ ընդամենը տարբերվում է ուրիշներից:
«Դուք սատանիստին լուրջ կվերաբերվեիք այն ժամանակ, եթե նա հանրապետական լինե՞ր: Բայանդուրի հետ ծանոթացել եմ Մաշտոցի այգում, բլոգում նույնպես կարդացել եմ իր սկզբունքների մասին, ինչը եւս ինձ հետաքրքրեց: Իր տեսակի հայտնվելը շատ թանկ բան է, միտք է շարժում եւ նրա նմանները ազգի զարգացման համար ամենակարեւոր մարդիկ են: Որպես հեղափոխական դեմք, Բայանդուրը իր տեսակով կարեւոր է: Ցանկացած մարդու մեղադրում են, սակայն ոչ ոք դրա իրավունքը չունի: Մեր այս շարժումների շնորհիվ է, որ այսօր քաղաքապետը սովորել է հասարակության հետ խոսել՚,- բոլորին դիմեց Մարինե Պետրոսյանը:
Անժելա ՇԱՀՈՒՄՅԱՆ
