«Զգացմունքներս խեղդում էին ինձ,մեկ տարի առաջ`այս նույն օրը սերն ինձ այցի եկավ: « Ես սիրում եմ քեզ» այս խոսքերը բոլորինն են, բայց այս պահին ես ու դու ենք այս խոսքերի միակ տերերը»:
Արմանի սիրո խոստովանությունը նույնքան օրիգինալ ու յուրահատուկ էր, որքան այն վայրը, որտեղ համարձակվեց արտասանել այն:
«Ինձ համար մեծ անակնկալ էր, գիտեի,որ այդ մի քանի օրվա ընթացքում առաջարկություն կանի: Զարմանքս մեծ եղավ. գիժ Արմանս սիրո խոստովանություն արեց երթուղայինի մեջ: Եթե այդքան լավ չճանաչեի նրան, հաստատ բացասական պատասխան կտայի»:
Անահիտի համար սա ամենագեղեցիկ սիրո խոստովանությունն էր, որ երբևէ լսել էր:
Սիրո խոստովանությունները սերենադների ծնունդն են: Մեր հերոսներն իրենց երկրորդ սիրո խոստովանությունն արել են սերենադի օգնությամբ:
«Սիրահարված ապուշի պես կանգնած երգում էի (ամոթխած ժպտում է-հեղինակ): Կինոներում տեսել էի, որ երբեմն փեսացուի բախտը չի բերում ու վերևից ապագա զոքանչը ջուր է լցնում: Սպասում էի, որ մի բան էլ իմ գլխին կգա: Բախտս բերեց. այս անգամ սիրած էակս նետվեց պատուհանից: Չվախենաք,առաջին հարկում էին ապրում»,-խոստովանում է Արմանը:
«Մինչև ականջների ծայրը սիրահարված» զույգը խոստանում է, որ նրանց ամուսնությունն էլ ավելի խենթություններով լեցուն կլինի: «Առավոտ երիտասարդականն» անպայման անպայման կանդրադառնա դրան:
Անուշ Առաքելյան
