Արդեն 15-րդ օրն է, ինչ Մաշտոցի պուրակի ակտիվիստները առավոտից երեկո այնտեղ են և իրենց բողոքն են արտահայտում պուրակում կառուցվող շինությունների դեմ:
Ակտիվիստ Ռուզաննան ասում է` 4 օր է, որ շինարարությունը ոչ պաշտոնապես դադարեցված է: Այդպիսի համաձայնություն նրանք ձեռք են բերել ոստիկանության հետ: Բայց դա նրանց համար հանգստի առիթ չէ:
Օրվա ընթացքում կազմակերպվում են տարբեր միջոցառումենր` ցուցահանդեսներից մինչև հեծանվավազք: «Առավոտ երիտասարդականի» այնտեղ այցելության ժամանակ երիտասարդ ակտիվիստները զբաղված էին պուրակի ձյան մաքրման աշխատանքներով:
Վերջերս լայն տարածում գտան ասեկոսեներ, ըստ որի, այս բողոքի ակցիան կազմակերպվել և հովանավորվում է դրսի ուժերի կողմից: Ակցիայի մասնակից Ռուզաննան էլ այդ խոսակցություններին պատասխանում է այսպես.
«Ու՞մ կողմից ենք ղեկավարվում, մենք էլ չգիտենք: Մենք այս ամենը անում ենք մեր համար: Ոչ մի քաղաքական կամ որևէ այլ ուժի չենք պատկանում: Իսկ երբ խոսվում է մեր` ինչ-որ ուժից կախվածության մասին, չեն կարողանում ասել, թե կոնկրետ ումից: Իսկ եթե չկա փաստ, ապա դա, ճիշտ լինել չի կարող»:
Երիտասարդներին ամեն օր միանում են տարբեր հանրաճանաչ ու սովորական մարդիկ և իրենց ծրագրերն ու օգնությունն առաջարկում:
«Ի՞նչ է նրանց էլ են դրսի ուժերը հովանավորում»,- զարմանում է ակտիվիստը:
Հասարակության կողմից էլ արժանանում են լավ գնահատականի: Դա է ապացուցում օրվա ընթացքում հարյուրավոր մարդկանց ներկայությունը: Ակցիան կշարունակվի այնքան, մինչև վերջնականապես չդադարեն պուրակում սկսված շինարարությունները: Իսկ իրենց հաջողության մեջ երիտասարդները համոզված են:
«Ապագա «կանաչ» ճարտարապետները միանում են բնապահպաներին», «Եղունգ ունես, բուծիկդ փորի», «Այգին ժողովրդին». Այս կարգախոներն են փակցված այգում:
Ակցիայի մյուս մասնակցի` Բայանդուր Պողոսյանի մասին հնչող խոսակցություններն ավելի թեժ են: Պատճառը նրա սատանիստ լինելն է: Պուրակի խնդրի մասին իմացել է համացանցից, եկել ու միացել մնացած երիտասարդներին: Անդրադառնալով իր մասին հնչող խոսակցույուններին` ասում է.
«Իրականում, երբ 2001 թվականից ես գիտակցեցի, իմ փիլիսոփայական գիտակցությունը, խոսակցություններն այդ ժամանակվանից են սկսել: Եթե ես փոշմանեի իմ ընտրած ուղղուց, ապա բավականաչափ քաջություն ունեմ խոստովանելու իմ սխալը»: Ըստ նրա, իր այդպիսի ուղղվածությունը կապ չունի պուրակում կազմակերպված ակցիայի հետ ու պետք չէ անձնականը խառնել ընդհանուրի հետ:
Արամ Արարատյան
