«Գագիկ Ծառուկյան» բարեգործական հիմնադրամի մեկենասությամբ լույս է տեսել հայկական «Դյուցազնագիրք» շարքի առաջին գիրքը, որտեղ ամփոփվել են Հայաստանի անկախության տարիների ընթացքում հայի արտասովոր տեսակի, ուժի, անկոտրում կամքի եւ հնարամտության նվաճումները:
Մեր «Դյուցազնագիրքը» յուրօրինակ «Գինեսի» ռեկորդների գիրք է: Բայց այն «Մայր գրից» տարբերվում է իր լրջությամբ՝ նրանով, որ ամենաանհեթեթ արդյունքների փոխարեն գրանցվել են հայի տեսակի միայն իսկապես գնահատման արժանի ցուցանիշները:
Գագիկ Ծառուկյանը գրքի նախաբանում գրել է. «Այս գիրքը «Գինեսի» հայկական ռեկորդների յուրօրինակ հանրագիտարան է, որը նախերգանքն է մեր ապագա մեծ նվաճումների: Հայ ժողովուրդը աշխարհին հայտնի է գրականության, մշակույթի, գիտության, արվեստի եւ, հատկապես, մարզաշխարհի տաղանդավոր ներկայացուցիչներով: Վստահ եմ, որ մեր ազգը այսուհետ իր բազկի հզոր ուժով, դարերի փորձությունների միջով անցած իր իմաստնությամբ, զարմանալի կենսունակությամբ, հայրենիքի եւ ընտանիքի հանդեպ ունեցած անշեղ հավատով կվերստեղծի երբեմնի դրախտավայր Հայաստանը, որի հիմքերը դնում ենք մենք՝ մեր դյուցազն նախնիների ժառանգորդներս»:
Գրքի հեղինակ Վարդան Թովմասյանն իր հերթին գրքում նշել է, որ ամփոփվել են հայորդիների վեց տասնամյակից ավելի նվաճումները, որոնք պաշտոնապես գրանցվել են մեր հանրապետության «Դյուցազնագիրք» պաշտոնական հանձնաժողովում: Բայց շնորհանդեսի ժամանակ իր խոսքում նաեւ հայտարարեց, որ արդեն իսկ գրանցվել են նոր ռեկորդներ, որոնք ներկայացված են պաշտոնական հաստատման, իսկ շատերն էլ սպասում են գրանցման իրենց հերթին:
Շնորհանդեսին ՀԱՕԿ-ի նախագահ Գագիկ Ծառուկյանը մեկ անգամ եւս վստահեցրեց, որ ինքը խրախուսելու եւ աջակցելու է ցանկացած նախաձեռնություն, հատկապես՝ մարզական ոլորտի, եթե այն նպաստելու է մեր երկրի հեղինակության բարձրացմանն ամբողջ աշխարհում: Եվ, ի հաստատումն իր խոսքերի, «Դյուցազնագրքի» ստեղծագործական կոլեկտիվին առաջարկեց շարունակել սկսած լավ գործը՝ խոստանալով, որ հայկական «Գինեսի» ռեկորդների նոր նվաճումներն անձամբ կհրատարակի: Ու տեղում նոր ստեղծվող «Դյուցազնագիրք» հիմնադրամի հաշվեհամարին փոխանցեց չորս միլիոն դրամ: «Որքան շատ լինեն հայոց նոր ձեռքբերումները, այնքան հաճախակի դրանք կտպագրվեն հերթական նոր գրքերում՝ անկախ դրանց անհրաժեշտության հաճախականությունից»,- խոստացավ Գագիկ Ծառուկյանը:
ԱՇՈՏ ՀԱԿՈԲՅԱՆ
«Առավոտ» օրաթերթ
