Մամուլում այսօր տեղեկություն էր հրապարակվել, թե «Ժառանգություն» եւ «Ազատ դեմոկրատներ» կուսակցություններն արդեն որոշել են, որ ԱԺ առաջիկա ընտրություններին մասնակցելու են միասնական ցուցակով: Բայց քանի որ, ըստ այդ տեղեկատվության, այդ կուսակցություններում հաշվարկել են, որ ընտրություններին դաշինքով մասնակցելու դեպքում դժվար է լինելու հաղթահարել ԱԺ մտնելու համար անհրաժեշտ 7%-անոց շեմը, ուստի որոշել են, որ «ազատ դեմոկրատների» մի շարք անդամներ պետք է ընդգրկվեն «Ժառանգության» համամասնական ցուցակում: Թերթում ներկայացվել էր նաեւ այդ ենթադրյալ ցուցակի առաջին տասը տեղերում հանգրվանած քաղաքական գործիչների անուններն ու հերթականությունը:
Aravot.am-ի հետ զրույցում «Ազատ դեմոկրատներ» կուսակցության ղեկավար Խաչատուր Քոքոբելյանն ասաց, թե բազմիցս նշել են եւ երբեք չեն թաքցրել, որ շփումներ ունեն «Ժառանգություն» կուսակցության հետ, եւ որ միասին տարբեր խնդիրներ են քննարկում: Քոքոբելյանը փորձում էր ձեռնպահ մնալ որեւէ մեկնաբանություն անելուց` համարելով, որ «դա անհեթեթություն, մատից հոտ քաշելով հրապարակված տեղեկություն է ընդամենը, քանի որ ո’չ առանձին-առանձին, ո’չ դաշինքով եւ առավել եւս ո’չ էլ նման միասնական ցուցակով մասնակցելու մասին որոշում դեռ չեն էլ կայացրել»:
Այդուհանդերձ, կուսակցության ղեկավարը վստահաբար ասաց, թե հրապարակված տեղեկությունն իրականությանը բացարձակապես չի համապատասխանում. «Ինչ վերաբերում է մեր եւ «Ժառանգության» միասնական հանդես գալուն, ապա այս պահին նման որոշում չկա, բայց կան երկուստեք ե’ւ շփումներ, ե’ւ քննարկումներ, եւ ես հույս ունեմ, որ դա կարող է դրական ավարտ ունենալ»:
Դիտարկմանը, թե` «Ազատ դեմոկրատներն» ու «Ժառանգությունը» հաշվարկել են, որ ընտրություններին դաշինքով մասնակցելու դեպքում ԱԺ մտնելու համար անհրաժեշտ 7%-անոց շեմը դժվար է լինելու հաղթահարել եւ որոշել են, որ ազատ-դեմոկրատներն ընդգրկվեն «Ժառանգության» ցուցակում, Քոքոբելյանն արձագանքեց. «Այն, որ թե’ ազատ դեմոկրատները, թե’ «Ժառանգությունը» 5 կամ 7 տոկոսը հաղթահարելու խնդիր չունեն ո’չ առանձին-առանձին, ո’չ էլ միասնական դաշինքով հանդես գալու դեպքում` մեր հանրությունն առաջիկայում կհամոզվի: Կարծում եմ, նման տեղեկություններ շրջանառելն այն նույն սեւ PR-ի, մեր վրա ցեխ շպրտելու շարքից է, որն իրականացվում է կուսակցության ձեւավորումից ի վեր»:
Կարդացեք նաև
«Ժառանգություն» կուսակցության ներկայացուցիչ Արմեն Մարտիրոսյանն էլ հրապարակված տեղեկատվության վերաբերյալ կեսկատակ-կեսհեգնանքով ասաց, թե այդ տեղեկությունն «անմեկնաբանելի է». «Մենք ինչպե՞ս կարող ենք որոշել, թե մեր միասնական ցուցակն ինչպիսին կարող է լինել, եթե ազատ դեմոկրատների հետ դաշինքով կամ առանձին հանդես գալու որոշում դեռ չենք ընդունել: Այդ տեղեկությունը նույնիսկ անմեկնաբանելի է, որովհետեւ ո’չ կարող եմ հաստատել, ո’չ ժխտել, որովհետեւ նման հարց չի քննարկվել»:
Ինչ վերաբերում է մասնավորապես «Ժառանգության» «անցողիկությանը», ապա կուսակցության ներկայացուցիչն ասաց. «Ես վստահ եմ, որ «Ժառանգությունը» առանձին հանդես գալու դեպքում 5 տոկոսանոց շեմը կարող է հաղթահարել, դաշինք կազմելու դեպքում էլ` 7 տոկոսը»:
