Այսօր «Եվրասիա համագործակցություն» հիմնադրամի կողմից կազմակերպվել էր «Շփման գիծ: Ի՞նչ է պետք անել հայ-ադրբեջանական հարաբերությունների կարգավորման համար» խորագրով հանրային քննարկում: Բոլոր մասնակիցները նախ կարեւորեցին անաչառ լրատվությունը հայ-ադրբեջանական հարաբերությունների վերաբերյալ:
Երևանի մամուլի ակումբի նախագահ Բորիս Նավասարդյանը նշեց, որ պետք է այնպես արվի, որ հասարակությանը հասանելի դառնան հայ-ադրբեջանական հարաբերությունների մասին բոլոր փաստերն ու կարծիքները:
«ԱրմՌադիոյի» տնօրեն Արման Սաղաթելյանն էլ կարծում է, որ Հայաստանում ԶԼՄ-ները գործում են գովազդի կամ էլ քաղաքականության համար:
«Մեր մամուլը քաղաքականացված է, բայց մենք պետք է աշխատենք փոխել թե լրագրողի եւ թե լրատվամիջոցի դիրքորոշումը»,- ասում է «Ինտերնյուս-Հայաստան» կազմակերպության նախագահ Նունե Սարգսյանը: Ըստ նրա, եթե լրատվամիջոցը հստակ ընտրել է իր ուղղությունը, պարզ է, որ այնտեղ աշխատող լրագրողը ոչինչ չի կարող փոխել:
Կարդացեք նաև
«Երկիր մեդիա» հեռուստաընկերության քաղաքական եւ լրատվական ծրագրերի ղեկավար Գեղամ Մանուկյանն էլ քննարկման ժամանակ հայտարարեց, որ Հայաստանում Ադրբեջանի մասին անաչառ լրատվություն չի կարող լինել, չի կարող լինել նաև Ադրբեջանում՝ Հայաստանի մասին: Տեղեկացրեց նաև, որ իր լրագրողներին արգելել է օգտվել ադրբեջանական կայքերից:
Բորիս Նավասարդյանի խոսքով, լրագրողների համար կա ողջամտության սահման, որից այն կողմ անցել չեն կարող: Պարոն Նավասարդյանի համար այդ սահմանը կեղծ տեղեկություն չտարածելն է:
Արամ ԱՐԱՐԱՏՅԱՆ
