Այսօր Հայաստանում Ֆրանսիական համալսարանում կայացավ համաժողով ՝ «Արդյոք կարելի՞ է խոսել եվրոպական մշակույթից» խորագրով, որին ներկա էր նաեւ Հայաստանում ԵՄ պատվիրակության ղեկավար Տրայան Հրիսթեան:
«Մշակույթը ավելի լայն է, քան միայն տվյալ երկրի ադաթները,- ասաց համաժողովի հիմնական բանախոսներից մեկը ` Հայաստանում Ֆրանսիայի արտակարգ եւ լիազոր դեսպան Անրի Ռենոն,- Երկրի մշակույթն իր վարվելակերպն է, իր ԴՆԹ–ն: Մինչ այսօր երկրների վարվելակերպի մեջ մեծ տարբերություններ կան, ինչպես Ֆրանսիայի և Գերմանիայի մոտեցումը մի շարք հարցերի: Օրինակ՝ Ֆրանսիայի կառավարությունն իր պարտքն է համարում աջակցել Կենտրոնական բանկի գործունեությանը, իսկ գերմանացիների համար Կենտրոնական բանկի ինքնուրույնությունը անխախտելի է: Այս դեպքում կարևոր է փոխհամաձայնության գալ: Եվրոպայի կարևորագույն ձեռքբերումներից է ընդհանուր արժույթը ` եվրոն: Թեև կան ասպարեզներ, որտեղ դեռ մեծ աշխատանք պիտի տարվի, օրինակ՝ Եվրոպայի ընդհանուր արտաքին քաղաքականության մշակումը»:
Խոսելով եվրոպական մշակույթի մասին՝ պարոն Ռենոն հիշեց այն ժամանակները, երբ Եվրոպային անվանում էին «առանց հոգու Եվրոպա» կամ «վաճառականների Եվրոպա»: «Այն ժամանակ մեծ դեր խաղաց Ժան Մոնրեի որդեգրած քաղաքականությունը, որի նպատակն էր ոչ թե ապրանքների փոխանակումը, այլ մարդկանց մերձեցումը»:
Համաժողովին ներկա ՀՀ մշակույթի փոխնախարար Արեւ Սամուելյանն ասաց, որ Հայաստանը ակտիվորեն մասնակցում է Եվրոպական մշակութային ծրագրերի, ինչպիսին են «Պահպանենք մեր մշակութային քաղաքները» եւ «Գրական տապան» նախաձեռնությունները: Նա փաստեց, որ ստեղծվել է «Ոսկե ծիրան» տարածաշրջանային կինոդպրոցը, որտեղ եվրոպական կինոարվեստի մի շարք գործիչներ անցկացրել են վարպետաց: Այս տարի արդեն ութերորդ անգամ կանցկացվի «Թանգարանային գիշեր» ակցիան:
Կարդացեք նաև
Ստելլա ՏԵՐՏԵՐՅԱՆ
