Այսօր «Պոստ Սկրիպտում» մամուլի ակումբում ՕԵԿ անդամ Մհեր Շահգելդյանը հայտարարեց, որ իրենց կուսակցության դեմ սև քարոզչություն են իրականացնում, հատկապես նախընտրական այս շրջանում:
Պարոն Շահգելդյանն անդրադարձավ մամուլում հրապարակված այն լուրերին, թե Էրեբունի վարչական շրջանում կուսակցությունը բաժանել է ընտրակաշառքներ: Այս առիթով նա ասաց. «Ընտրակաշառքների օր ՕԵԿ-ում երբեք չի եկել եւ չի էլ գալու: Ընտրակաշառքների ժամանակը մեզ համար երբեք չի եղել, չի էլ լինելու»:
Երեկ կայացած մամուլի ասուլիսում ՀՀԿ փոխնախագահ Գալուստ Սահակյանը հայտարարել էր, որ ՀՀԿ-ն այնքան բարեսիրտ չէ, որ կուսակցություններին, այդ թվում նաև ՕԵԿ-ին բռերով ձայներ բաժանի: Այս խոսքերը Մ. Շահգելդյանն այսպես մեկնաբանեց. «Ստեղծման առաջին իսկ օրվանից ՕԵԿ-ը որևէ աջակցությամբ ձայներ չի հավաքել, դա աբսուրդ է: Մենք մեր ձայները մեր աշխատանքի արդյունքում ենք հավաքել: ՕԵԿ-ը մշտապես աշխատել է ինքը և աշխատում է»:
Aravot.am-ը Մ. Շահգելդյանին խնդրեց մեկնաբանել ներկուսակցական պառակտումների՝ հատկապես Հեղինե Բիշարյանին առնչվող խնդիրների մասին լուրերը: Նա ասաց. «Չկա և չի կարող լինել նման բան: Հարցն աբսուրդային է: Ես և Հեղինե Բիշարյանը հին կուսակցական ընկերներ ենք, միասին պայքարել ենք և պայքարել շարունակելու ենք և գնալու ենք առաջ»: Մեր դիտարկմանը, թե առանց կրակ ծուխ չի լինում, Մ. Շահգելդյանը պատասխանեց. «Տվյալ դեպքում ոչ միայն կրակ չկա, այլև ծուխ չկա: Որոշ մարդիկ են փորձում ծուխ տեսնել»:
Կարդացեք նաև
Տաթև ՀԱՐՈՒԹՅՈՒՆՅԱՆ
