Այսօր «Պոստ Սկրիպտում» ակումբում լրագրողների հարցին, թե ինչպե՞ս կմեկնաբանեք Ռաֆիկ Պետրոսյանի եւ Պարույր Հայրիկյանի` դաշնակցության հասցեին վերջերս արված հայտարարությունները, թե ՀՅԴ-ն զառամյալ ծերունի է եւ կորցրել է հանրային վստահությունը` ՀՅԴ խմբակցության ղեկավար Վահան Հովհաննիսյանը պատասխանեց. «Գիտեք ինչ, ես շատ լավ գիտեմ ով է իրենցից զառամյալ ծերունին եւ ով է կորցրել հասարակության վստահությունը: Բայց ի տարբերություն իրենց, ես դաստիարակված մարդ եմ, ես չեմ ասի դա: Այդ առումով կարծում եմ` նման արտառոց ափռ-ցփռ հայտարարություններին մեր հասարակությունը վաղուց ուշադրություն չի դարձնում, որովհետեւ տեսել ենք թե’ իրենց պահվածքը, թե’ իրենց դավանանքները, տեսել ենք, թե ինչպիսի արագությամբ են փոխվում կուսակցական իրենց տարբերանշանները նրանց բաճկոնների վրա, այսինքն այդ մարդկանց ասածները ես ինչի՞ պիտի մեկնաբանեմ: Լեւոն Տեր-Պետրոսյանն էլ էր մի անգամ տենց բան ասում: Հետո՞: Ի՞նչ եղավ»:
ՀԱԿ-ն ու կոալիցիան երբ երկխոսում էին, կոալիցիայի օրակարգի հարցը խաղի կանոններ պայմանավորվելն էր: Հարցին` հիմա դրա անհրաժեշտությունը չկա՞, պարոն Հովհաննիսյանը պատասխանեց, որ ոչ: Նրա մեկնաբանությամբ` «ՀԱԿ-ը տեղավորվեց իշխանությունների նախատեսած ծրագրի մեջ: Քանի որ ՀԱԿ-ը անթաքույց ձգտում է սեփական իշխանությունը հաստատելուն, այս որոշների կողմից մոլուցքը շատ գեղեցիկ կերպով շահագործվեց եւ տեղի ունեցավ այդ երկխոսությունը: Երկխոսության արդյունքում իշխանությունը երկխոսությունից դուրս եկավ ուժեղացած, ՀԱԿ-ը` թուլացած: Հիմա ՀԱԿ-ի սխալն էր, թե իշխանության հմտությունը` դա առանձին հարց է: Բայց քանի որ ՀԱԿ-ը թուլացավ դրա ադյունքում, ՀԱԿ-ից անջատվեցին բավականին գործունյա, ռեալ դերակատար մարդիկ, արդյունքում` իշխանության մոտիվացիան համատեղ փոխել կանոններ եւ այլն` մարեց շատ արագ: Հիմա դեռ չեմ տեսնում առնվազն ՀԱԿ-ի կողմից անհրաժեշտ քայլեր` այդ մոտիվացիան վերակենդանացնել: Դա անում ենք մենք` առանց թմբկահարելու հրապարակներում, առանց պարելու: Հիմա նոր մոդա է, չէ՞, միտինգներում պարել, նման բաներ չենք արել երբեք: Հիմա առանց այդ բոլոր թատերական հատվածների, մենք դա անում ենք, եւ կարող է արդյունավետ լինի»:
Հռիփսիմե ՋԵԲԵՋՅԱՆ
