Հայաստանի ոստիկանության ներքին անվտանգության վարչության պետ, գնդապետ Ա. Հակոբյանից երեկ ստացել ենք պաշտոնական գրություն: Ըստ այդ գրության, ՀՀ ոստիկանապետի հանձնարարությամբ ուսումնասիրվել է փետրվարի 2-ի «Առավոտում» տպագրված տողերիս հեղինակի «Ոստիկանները շիկացած երկաթով այրել են ոտքը, խոշտանգել» հոդվածը:
Ոստիկանությունը չի հաստատում Մաշտոցի ոստիկանության բաժնում Ֆելիքս Գեւորգյանին խոշտանգելու հանգամանքները: Ներքին անվտանգության վարչության պետի պաշտոնական գրության համաձայն, Ֆ.Գեւորգյանի պաշտպան Ստեփան Ոսկանյանի բարձրացրած հարցադրումներին անդրադարձ է կատարվել վերոհիշյալ քրեական գործի նախաքննության ընթացքում, իսկ քննիչի կողմից կայացված որոշումը փաստաբանի կողմից չի բողոքարկվել:
«Կատարված ուսումնասիրության ընթացքում ընթերակա Մանուկ Գյուլշադյանը բացատրությամբ հայտնել է, որ Ֆ.Գեւորգյանին ոտքը կաղալիս չի տեսել, դատարանում նման ցուցմունք է տվել վերջինիս հարազատների հոգեբանական ճնշումների ազդեցության տակ: Հետագայում դիմում է ներկայացրել Աջափնյակ եւ Դավիթաշեն վարչական շրջանների ընդհանուր իրավասության դատարան եւ տվել ճիշտ ցուցմունք»,- ասվում է պաշտոնական գրության մեջ:
«Առավոտ» օրաթերթ
