Արվեստի վաստակավոր գործիչ Լաերտ Պողոսյանն օրերս ԱՄՆ-ից նամակով դիմել է «Առավոտին»՝ մտահոգություն հայտնելով մեր երկրում գործող կենսաթոշակային համակարգից: Ըստ նրա՝ համակարգի անկատարության պատճառով մի քանի ամիս է՝ իր ու տիկնոջ կենսաթոշակը կասեցված է: Լաերտ Պողոսյանը գտնում է, որ այդ հարցը ոչ միայն իրավական, այլեւ բարոյական լուծում է պահանջում, ինչի ակնկալիքով էլ ամիսներ առաջ դիմել է ՀՀ վարչապետ Տիգրան Սարգսյանին: Մտավորականի նամակից հետո աշխատանքի եւ սոցիալական հարցերի նախարարությունը դիմել է ԱՄՆ՝ ճշտելու համար, թե արդյոք Լ. Պողոսյանն ու իր կինը այնտեղ կենսաթոշակ ստանո՞ւմ են, թե՞ ոչ, այնուհետեւ՝ մերժել նրանց կենսաթոշակի տրամադրումը:
Ըստ Լաերտ Պողոսյանի՝ «Ամենայն պատասխանատվությամբ ասում եմ, որ ԱՄՆ-ում չեմ ստանում: Քանի որ կենսաթոշակ կարող է ստանալ տվյալ երկրի այն քաղաքացին, ով աշխատել է այդ երկրում, եւ տարիքը լրանալուց հետո կարող է ստանալ ծերության թոշակ: Պարոն վարչապետ, կարող է Ձեզ հաջողվի բացատրել վերոհիշյալ նախարարության չինովնիկներին, որ ես եւ կինս ավելի քան 50 տարվա անբասիր աշխատանքով Հայաստանում վաստակել ենք այդ կենսաթոշակը, ի դեպ, իր չափերով՝ ողորմելի, եւ ոչ մեկին իրավունք չի վերապահվում հարցականի տակ դնել վերոհիշյալ կենսաթոշակը տալը կամ չտալը: Վերջապես կարողացեք տարանջատել կենսաթոշակը նպաստից, մի չնչին գումար, որով հնարավոր է հոգալ մեր կենսական հարցերը եւ գոյատեւել: Ասուլիսի ժամանակ սոցիալական ոլորտի պատասխանատուները հայտարարում են, որ այսուհետ մահացածները եւ հանրապետությունից բացակայողները կենսաթոշակ չեն ստանա, այսինքն՝ ստացվում է, որ հանրապետությունից բացակայողները հավասարեցված են մահացածների՞ն: Պարոն վարչապետ, ես չէի անհանգստացնի Ձեզ, եթե վերոհիշյալ հարցում չլիներ հարցի բարոյական եւ հոգեւոր կողմը: 80-ն անց մարդը դիմում է երկրի վարչապետին՝ տարիների ընթացքում իր աշխատած ու վաստակած գումարը ստանալու համար: Տխուր է… Հավատացեք, այն ցավալի արտագաղթը, որ շարունակվում է, հիմքում ընկած է ոչ միայն նյութականը, այլեւ ամեն քայլափոխի հանդիպող անարդարությունը, պետապարատի աշխատողների կողմից բիրտ ու անբարո վարքագիծը ու նրանց անպատիժ գործելակերպը»:
Սեփ. լր.
«Առավոտ» օրաթերթ
