Մելինեն եվրոպական ամսագրերից ոգեշնչված որոշել էր ծննդաբերել ջրում: «Սակայն երբ բժիշկներից տեղեկացա ջրային ծննդաբերության հնարավոր վտանգների մասին, փոշմանեցի», – ասում է 34-ամյա կինը:
Ծննդաբերությունը կանանց համար մեծ փորձություն է թե մտքի, վախերի և թե ցավը հաղթահարելու տեսանկյունից: Ըստ www.babycentre.co.uk կայքի` ջրում ծննդաբերությունն արագ է ընթանում և, կծկումներ առաջացնելու նպատակով, ֆարմակոլոգիական միջամտության կարիք չի զգացվում: Սակայն ջրային ծննդաբերության վերաբերյալ բժիշկների կարծիքները տարբեր են: Նրանցից մի քանիսը կարծում է, որ այդպիսի ծննդաբերությունը կարող է վտանգավոր լինել նորածնի կյանքի համար, իսկ ոմանք պնդում են, որ վտանգն այդքան էլ մեծ չէ: «Ծննդաբերությունը բնական երևույթ է, սակայն այն ավելի բնական է դառնում, երբ երեխան կարողանում է անցում կատարել պտղաջրից` լոգարանի ջրին: Այդպես նրան ավելի հեշտ է դուրս գալ մի միջավայր, որտեղ անցկացրել է 9 ամիս», – ասում է մանկաբարձ Սալվատոր Պոլինան: Ջրային ծննդաբերության ժամանակ ծննդաբերական գործընթացն ավելի մեղմ է ընթանում` շնորհիվ ջրի փափկեցնող հատկության, իսկ պատռվածքների ռիսկը նվազում է:
«Ծննդաբերական ջուրը պաշտպանում է կնոջ մարմինը` թեթևացնելով քաշը և թուլացնելով փորի, ծննդուղիների մկանները, արգելափակում ցավի ազդանշաններն ու նվազում ծննդաբերության ժամանակը», – նշում է մանկաբարձ Նունե Համբարձումյանը: Նրա կարծիքով՝ այսպես` կտրվածքի (հեշտոցից սրբան) և փորին սեղմելու մեթոդի կարիք չի զգացվում, նորածնի շնչառության գործընթացը հանկարծակի չի լինում, իսկ ծննդկանի համար տարածությունը բավական է լինում` տարբեր դիրքեր ընդունելու համար: «Ջրային ծննդաբերությունը հակացուցված է նեղ կոնքեր և մեծ պտուղ, սրտանոթային համակարգի հիվանդություններ, նաև` արյան բարձր ճնշում ունեցող կանանց», – հավելեց մանկաբարձը: Ըստ մասնագետի` այսպիսի ծննդաբերության ժամանակ առկա են հիգիենայի խնդիրներ, վարակների մեծ հավանականություն, նորածնի կողմից ջրի ներշնչման հնարավորություն և այլն: «Հիշում եմ, երբ տատիկս պատմում էր մի հարևանուհու մասին, ում նորածին երեխան սեփական տան լողավազանում ծննդաբերելու ժամանակ մահացավ: Բժիշկները համոզված էին, որ եթե երեխային ջրից արագ հանեին` ջուրը չէր լցվի նրա թոքերը և չէր մահանա», – պատմում է Մոնիկան: «Ջրային ծննդաբերության ժամանակ վտանգներից խուսափելու համար նախևառաջ բժիշկները պետք է վերահսկեն ծննդկանի առողջական վիճակը», – նշում է ռումինացի բժիշկ Պաուլ Յոնեսկուն: Ըստ մասնագետների` ծննդաբերական լոգարանի ստանդարտ չափսը պետք է լինի 2×1,5 մ` 60-80 սմ խորությամբ և 220 սմ ոչ պակաս լայնությամբ: Ջուրը պետք է լինի տաք, իսկ ջերմաստիճանը հաստատուն (36,5-37°), որը կարելի է հեշտ կարգավորել` հատուկ սարքերի միջոցով:
Այնուամենայնիվ, ինչպես նշում են մասնագետները, ջրային ծննդաբերությունը առողջ կանանց համար է, որոնք անցել են ջրային ծննդաբերության հատուկ դասընթացներ:
Ելենա Չոբանյան
