Սամվել Զոհրաբյան
Ինչպես երեկ՝ փետրվարի 22-ին, Կոտայքի մարզից տեղեկացրել էր ֆոտոլրագրող Գագիկ Շամշյանը՝ Աբովյանի բժշկական կենտրոն էր տեղափոխվել Կոտայքի մարզի Արամուս գյուղի բնակիչ, 44-ամյա Արթուր Սերոբյանը, որը ստացել էր գանգուղեղային վնասվածք և աջ դաստակի ոսկրի կոտրվածք։ Նրա կինը՝ Լարիսա Միքայելյանը, պատմել էր, որ գյուղում դպրոցի տնօրեն Սամվել Զոհրաբյանի ցուցումով տնօրենի հարազատները հարձակվել և ծեծի էին ենթարկել իր ամուսնուն՝ պատճառաբանելով, թե այս ամենը պայմանավորված է այն հանգամանքով, որ տնօրենը դպրոցից անհիմն կերպով հեռացրել է իր 15-ամյա տղային՝ Արտյոմ Սերոբյանին, որն ունի հենաշարժական ապարատի խնդիրներ, քայլում է դժվարությամբ։ Նշված փաստի առթիվ ոստիկանության Կոտայքի բաժնում սկսվել է հետաքննություն։
Այսօր՝ փետրվարի 23-ին, ֆոտոլրագրողը հանդիպել և զրուցել է Արամուսի դպրոցի տնօրեն Սամվել Զոհրաբյանի հետ։ Վերջինս հերքել է Լարիսա Միքայելյանի մեղադրանքները՝ հայտնելով. «Ես այն անձնավորությունը չեմ, որ նման ճղճիմ բաներով զբաղվեմ: Եվ տեղեկություններ չեմ ունեցել կատարված միջադեպի մասին, իսկ նրանց տղային դպրոցից ազատել եմ, քանի որ 2008 թվականի սեպտեմբերի 1-ին տղայի հայրը՝ Ա. Սերոբյանը, դիմում է գրել և խնդրել, որ իր երեխային ազատեմ դպրոցից, քանի որ իրենք ցանկանում են իրենց երեխային տեղափոխել այլ ուսումնական հաստատություն»։
