«Facbook» սոցիալական ցանցի «Խոսքի իրավունք միավորման» հիմնադիր խմբի անդամ Հակոբ Սանթրոսյանը, երեկ ի պատասխան Մենուա Հարությունյանի կարծիքի, թե Մաշտոցի պուրակի համար պայքարողները գրանտակերներ են, «Առավոտին» ասաց. «Այդ բառը մեր հասարակությունում վերջերս ստացել է խիստ բացասական երանգ: Մարդուն անվանել գրանտակեր՝ նշանակում է շեղել հասարակության ուշադրությունը նրա գործի բուն էությունից եւ արատավորել: Այդ նույն դրամաշնորհներն իրականում ստանում են նաեւ իշխանությունները: Ամեն օր տարբեր ոլորտի պաշտոնյաները կարծես քնից արթնանում եւ հասկանում են, որ այս կամ այն նորամուծությունը պետք է արվի իրենց ոլորտում: Օրինակ՝ կրթության եւ այլ ոլորտներում: Այդ բարեփոխումներն արվում են, քանզի միջազգային կազմակերպություններից շահել են դրամաշնորհներ: Սակայն նրանց չեն կպցնում տարբեր պիտակներ: «Խոսքի իրավունք միավորումը» անձնական շփումներ քիչ է ունեցել տարբեր կազմակերպությունների հետ եւ չգիտի, թե ով, որքան եւ ինչու է ստանում գրանտ: Սակայն գտնում է, որ բնության պահպանումը ազնիվ գործ է եւ պետք չի այն արատավորել: Մտածելու տեղիք է տալիս այն մարդկանց պահվածքը, ով այդ նախաձեռնություններին դեմ է արտահայտվում»:
«Առավոտ» օրաթերթ
