-3-րդ անգամ եմ ասում, տղա’, ցա’ծ իջիր սեղանից:
–Թե չէ ի՞նչ, էէէէ~, էս չգիտե՞ս ում տղեն ենք:
Դպրոցում ուսուցչի եւ աշակերտի այս «հաճելի» երկխոսությունից հետո, տեսնելով, որ դպրոցական սեղանի վրա «պպզած», ծամոնով ճտտացնող լպիրշ տղային չի կարողանում կարգի բերել, ուսուցիչը պտտվում է ու մի ուժգին հարված հասցնում նրան` գցելով գետնին: Իսկ աշակերտը, «հեսա դու քո հալը կտենաս» ասելով` զանգում է պապային` դպրոց մարդ ուղարկելու համար:
Լպիրշ տղայի համադասարանցիները, տեսնելով ուսուցչի «քաջությունը», ոտքի են կանգնում ու ծափահարում:
Կարդացեք նաև
Սա հայկական հերթական սերիալներից մի դրվագ չէր,ընդամենը գովազդային տեսահոլովակ է, որը այս օրերին ցուցադրվում է մեր հեռուստաալիքներով, այդ թվում` Հանրային հեռուստատեսությամբ:
Տեսահոլովակի սյուժեն ավարտվում է այսպես. «Ասում են, ավելի հեշտ է լինել անվախ, երբ առողջությունդ ապահովագրված է «Ինգո Արմենիայում»: Ինգո Արմենիա, վճարում ենք միշտ»:
Նշենք, որ «Գովազդի մասին» օրենքի համաձայն, մեր երկրում գովազդի լեզուն գրական հայերենն է:
6-րդ հոդվածի զ կետի համաձայն` «Արգելվում եւ հակաօրինական է համարվում այն գովազդը, որն իրականացվում է` օգտագործելով քաղաքացիներին բռնության, հարձակողականության, խուճապի, ինչպես նաեւ բարոյականության համընդհանուր նորմերի խախտման դրդող կոչեր»:
Ը կետի համաձայն, արգելվում է այն գովազդը, որտեղ սպառողի կյանքին, առողջությանը կամ անվտանգությանը սպառնացող գործողությունների դրդող կոչեր եւ փաստարկումեր կան:
Օրենքի 14-րդ հոդվածով արգելվում են այն գովազդները, որտեղ պարունակվում են տեսաձայնային այնպիսի դրվագներ, որոնք կարող են բարոյական կամ ֆիզիկական վնաս պատճառել անչափահասներին:
Նույն հոդվածի «գ» կետով արգելվում են գովազդները, որտեղ խաթարվում է ծնողների եւ դաստիարակների հեղինակությունը, անչափահասների վստահությունը նրանց նկատմամբ։
Եվ ի վերջո արգելվում է անչափահասների կերպարների տեսաձայնային կամ այլ ձեւով օգտագործումը գովազդում, եթե այն չի վերաբերում անչափահասների համար նախատեսված ապրանքներին։
Անկախ այս բոլոր խախտումներից, հաշվի առնելով, որ «Ինգո Արմենիան» «վճարում է միշտ», հարց է առաջանում, ընկերությունը պատրաստ կլինի՞ վճարել այն հսկայական վարչական տուգանքը, որը նախատեսված է այս խախտումների համար ինչպես գովազդը պատրաստող, այնպես էլ հեռարձակող ընկերությունների համար:
Հռիփսիմե ՋԵԲԵՋՅԱՆ
