ԵԱՀԿ/ԺՀՄԻԳ-ը հայտարարում է նաեւ, որ պատրաստվում է Հայաստան գործուղել 24 երկարաժամկետ եւ 250 կարճաժամկետ դիտորդներ՝ մայիսին
կայանալիք խորհրդարանի ընտրություններում դիտորդական առաքելություն իրականացնելու համար։ Այսպիսով, պետք է թերեւս արձանագրել, որ 2000 դիտորդ ուղարկելու ընդդիմության հորդորը կամ պահանջը միջազգային կառույցներն անտեսում են։ Ինչ խոսք, բացի ԵԱՀԿ դիտորդներից, դիտորդական առաքելություններ կլինեն նաեւ Եվրամիությունից, Եվրախորհրդից, ԱՄՆ-ից, գուցե նաեւ եվրոպական ոչ պաշտոնական հաստատություններից, սակայն խնդիրը տվյալ դեպքում այն է, որ հիմնական դիտորդական առաքելությունը, հետեւաբար ամենաբազմամարդ առաքելությունը, իրականացնում է ԵԱՀԿ-ն, եւ եթե ԵԱՀԿ-ն գործուղելու է 250 դիտորդ, ապա մյուս տեղերից դիտորդները կլինեն գգալիորեն պակաս, հետեւաբար 2000-ի չեն հասնի հաստատ։ Իսկ ընդդիմությունը 2000 էր ակնկալում, որ գոնե ամեն մի ընտրատեղամասում մեկ դիտորդ լինի առավոտից երեկո։ Մինչդեռ հասկանալի է նաեւ, որ անզամ մեկ դիտորդը այդ դեպքում ի զորու չէ իրականացնել լիարժեք առաքելություն։ Բայց, փաստորեն այդ մեկն էլ չի լինելու։ Իսկ դա ըստ էության որոշակի հակասության մեջ է մտնում թե բուն զեկույցի, թե նաեւ արեւմտյան պաշտոնյաների այն հայտարարությունների հետ, ըստ որոնց Եվրոպան բավական աչալուրջ է հետեւելու Հայաստանի իշխանության տված խոստումներին՝ ընտրության որակի մասով։ Եթե հետեւելու են աննախադեպ աչալրջությամբ, ապա թերեւս պետք է դիտորդների քանակն էլ լիներ համարժեք աննախադեպ։
«Ժամանակ»
