Հրազդանի քաղաքապետը փոխանակ պատասխանի ԶԼՄ-ների հարցերին` հորդորում է «նմանատիպ խոսակցություններին» ուշադրություն չդարձնել:
«Բազմիցս ասվել է, որ նմանատիպ խոսակցությունները չեն համապատասխանում իրականությանը: Եվ նման հարցերին անիմաստ է ուշադրություն դարձնել: Շնորհակալություն»,- այսպիսի պատասխան ենք ստացել Հրազդանի նորընտիր քաղաքապետ Արամ Դանիելյանին ուղղված մեր մի շարք հարցերին:
Aravot.am-ը պարոն Դանիելյանից պարզաբանում էր խնդրել, թե ո՞րն է տրամաբանությունը, որ Հրազդանում վերջին ընտրություններից հետո ընտրողների թիվը 3000-ով ավելացել է, մահացությո՞ւնն է նվազել, ծնելիությունն է ավելացել, թե՞ ներգաղթ կա Հրազդան:
Բացի այդ, մեզ նաեւ հետաքրքրում էր, թե Արամ Դանիելյանը հրահանգ տվե՞լ է ընտրողներին, որ ընտրակաշառք տալու կամ վերցնելու պահին «բռնվելու» դեպքում, ասենք, կուլ տվեք փողը, միայն թե անուններ չտաք, որովհետեւ նման միջադեպի մասին պատմում էր ՀՀՇ կուսակցության նախագահ Արամ Մանուկյանը:
Մենք մեկնաբանություն էինք նաեւ խնդրել այն տարածված տեսանյութի առնչությամբ, որտեղ ընտրողը պահանջում էր Արամ Դանիելյանից ընտրակաշառքներն արդար բաժանել` ասելով, որ ինքը երեխա է պահում, մյուսներին տվել է, ինչո՞ւ իրեն չի տվել:
Կարդացեք նաև
Պարոն Դանիելյանը հրաժարվել է պատասխանել նաեւ մեր այն հարցին, թե Հրազդանում հոգեկան հիվանդ մարդիկ շա՞տ կան, որովհետեւ ՀԱԿ անդամները վստահեցնում էին, որ ամեն ընտրատեղամասում միջինը 40-50 հոգեկան հիվանդ «բույս» է քվեարկել, մարդիկ, որոնք նույնիսկ ձայն հանել, կամք արտահայտել չէին կարողանում:
Հռիփսիմե ՋԵԲԵՋՅԱՆ
