«Չորրորդ ինքնիշխանություն» թերթի փոխանցմամբ, ՕԵԿ-ը Էրեբունի համայնքում ընտրակաշառք է բաժանում: «Ընտրակաշառքը բաժանվում է հիմնականում թոշակառուներին, եւ նրանց ասվում է, թե իբր Էրեբունի համայնքի թաղապետարանն է սոցիալական օգնություն ցուցաբերում տարեցներին»,- նշել է թերթը՝ հավելելով, որ ՕԵԿ-ի աշխատանքները Էրեբունի համայնքում կոորդինացնում է Էդուրադ Մադաթյանը՝ «Խուճուճ Էդոն»:
Aravot.am-ի հետ զրույցում ՕԵԿ խմբակցության ղեկավար Հեղինե Բիշարյանը կտրականապես հերքել է կուսակցության կողմից ընտրակաշառք բաժանելու մասին տեղեկությունը:
Այդ լուրերը հերքեց նաեւ Էրեբունի համայնքի ղեկավար Արմեն Հարությունյանը՝ հայտարարելով, թե թաղապետարանը սոցիալական որեւէ օգնություն չի բաժանում եւ որեւէ կուսակցության կողմից նման ակցիայի մասին տեղեկություններ չունի, որովհետեւ նման բան իսկապես չկա: Ավելին, նա անտրամաբանական համարեց, որ որեւէ կուսակցություն որպես ընտրակաշառք ինչ-որ բան բաժանի, բայց հայտարարի, թե դա ոչ թե իր կողմից է, այլ՝ թաղապետարանի, որը մասնավորապես ՕԵԿ-ի հետ որեւէ կերպ չի առնչվում: Էրեբունու թաղապետը նաեւ հայտարարեց, թե պայմանավորվածություններ կան ընդհանրապես այս համայնքում նման գործընթացներ չծավալել եւ ընտրակաշառք բաժանելուց ձեռնպահ մնալ:
