Երեկ վարչապետ Տիգրան Սարգսյանը անսպասելի հյուրեր է ուղարկել Գյումրու հիվանդանոցներ: Դեղերի թանկացման ֆոնի վրա կառավարության ղեկավարի վերահսկողական ծառայությանը հետաքրքրել է, թե ի՞նչ ճանապարհով են հիվանդանոցների տնօրենները դեղորայք ձեռք բերում, ի՞նչ գնով, արդյոք դրանց համար մրցույթ հայտարարո՞ւմ են, և կա՞ն արդյոք խարդախ գործարքներ, երբ ասենք տնօրենը, հանցավոր համաձայնության գալով դեղերի առքուվաճառքով զբաղվող կազմակերպության հետ, 1000 դրամանոց դեղը 5000-անոցի տակ է ձևակերպում: Մի խոսքով, վարչապետին հետաքրքրել է, թե ինչպես են ծախսվում պետության գումարները:
Այցը եղել է կարճատև, սակայն բավականին մեծ լարվածություն է ստեղծել հիվանդանոցներում, հատկապես, որ որոշակի փաստաթղթեր են առգրավվել: «Սամարիթեր» հիվանդանոցի տնօրեն Ռաֆիկ Խաչատրյանը հաստատեց մեր այս տեղեկությունը` նշելով սակայն, որ դրանք ոչ թե ստուգումներ են եղել, այլ ուսումնասիրություններ:
Ի դեպ, որպես ուսումնասիրության թիրախ Գյումրիի ոչ բոլոր բուժհաստատություններն են ընդրգրկվել: Առանձնացրել են, այսպես ասած, ռիսկայնություն պարունակող հիվանդանոցները, օրինակ` հոգեբուժարանը, ուռուցքաբանական դիսպանսերը, Գյուլբենկյանի անվան վիրաբուժական հիվանդանոցը, որտեղ ինքնակամ բուժվողներից զատ, հայտնվում են բոլոր դժբախտ պատահարների, այդ թվում նաև «ռազբորկաների» զոհերը: Ստուգումներ է անցկացվել նաև «Սամարիթեր» հիվանդանոցում, որտեղ մեկ տարի առաջ` ճիշտ այս ժամանակ, գիշերով առողջապահության նախարար Հարություն Քուշկյանը վերահսկիչ հանձնախումբ ուղարկեց ու, դժգոհ մնալով հիվանդանոցի հիգենիայից, դեղերի կոծկված գնացուցակից, որոշ աշխատակիցների նկատողություն տվեց: Այս հիվանդանոցները ընտրվել են նաև այն պատճառով, որ վերջիններս են օգտագործում «Պետգնումների մասին» ՀՀ օրենքը, համաձայն որի՝ 1 միլիոնից ավելի ապրանք գնելու դեպքում պարտավոր են մրցույթ հայտարարել:
Aravot.am-ը Շիրակի մարզպետարանի առողջապահության վարչության պետ Հովհաննես Հովհաննիսյանից հետաքրքրվեց, թե ինչու՞ է վարչապետը գաղտնի խումբ ուղարկել հիվանդանոցներ: «Վարչապետին գուցե այնպիսի բան է հետաքրքրում, որ ես էլ տեղյակ չեմ, հպանցիկ հանդիպում է եղել խմբի հետ, և գիտեմ, որ փաստաթղթային ստուգումներ են կատարվում` ճի՞շտ են դրանք ձևակերպված, թե՞ սխալ», -ասաց վարչության պետը: Նա նաև տեղեկացրեց, որ խումբը հպանցիկ հանդիպում է ունեցել նաև Շիրակի մարզպետարանի աշխատակազմի հետ ու հետաքրքրվել է Գյումրիում նոր կառուցվող բազմապրոֆիլ հիվանդանոցով, նաև դիահերձարանի շենքի խնդրով, որը, ըստ վարչության պետի, մարզի խայտառակությունն է: Նշենք, որ թեև պարոն Հովհաննիսյանը վարչապետի վերահսկողական ծառայության բուն այցի մասին մեզ մանրամասներ չհայտնեց, սակայն շրջայցի ընթացքում նա անձամբ է վարչապետի մարդկանց հիվանդանոցներ ուղեկցել:
Նունե ԱՐԵՎՇԱՏՅԱՆ
