Այսօր «Արմենպրես»-ի մամուլի սրահում Արդարադատության նախարարի տեղակալ Արամ Օրբելյանը՝ ներկայացնելով նոտարիատի ոլորտի եւ պետական ռեգիստրում կատարված բարեփոխումները, վստահեցրեց, որ մեր երկրին ոչ թե պետք են միայն «կնիք դնող» նոտարներ, ինչպես որ մինչ այժմ եղել է, այլեւ, ըստ փոխնախարարի, նոտարը մի մարդ է, ով մատուցում է իրավաբանական ծառայություններ. «Այսինքն՝ մենք պետք է դիտենք նոտարին, որպես անձի գույքային իրավունքները պաշտպանելու եւս մեկ մեխանիզմ, որը պետք է աջակցի արդարադատության իրականացմանը: Եվ նոտարի հիմնական գործառույթը պետք է լինի օգնել բեռնաթափել դատարանները՝ կնքելով ճիշտ պայմանագրեր, որոնք խնդիրներ չեն առաջացնի»:
Պարոն Օրբելյանի խոսքերով, նորաստեղծ վերահսկողության տեսչությունն էլ , բողոքների կամ ընթացիկ ստուգումների հիման վրա հայտնաբերած օրինախախտ նոտարների գործերը կուղարկի նոտարական պալատ, որը գործում է արդարադատության նախարարությունից առանձին: Այդ տեսչության հայտնաբերած խախտումների հիման վրա անցյալ տարի 4 նոտար արդեն պատասխանատվության է ենթարկել:
Փոխնախարարը քաղաքացիների բողոքների քանակությունից դատելով, հասկացել է, որ նոտարներից դժգոհությունները նվազել են, այդուհանդերձ, պարոն Օրբելյանը վստահեցրեց, որ սկսած նոտարների հագուկապից, քաղաքացիների հետ վարվեցողությունից նոտարները «բարեփոխվել» են. «Այլեւս չենք ունենալու կես մետրանոց դեկոլտեով, կես մետրանոց եղունգներով, 3 կիլոգրամ ոսկեղենով ու հաստ շպարով նոտարներ: Եթե նախանցած տարի որեւէ լրատվամիջոց փորձեր մտնել նոտարական գրասենյակ եւ այնտեղից կարողանար կենդանի դուրս գար եւ առանց վնասվածքների, ուրեմն բախտավոր մարդ կլիներ այդ լրագրողը: Անցյալ տարվա ընթացքում մի շարք հարցազրույցներ են վերցվել, այդ թվում, նրանց համար ոչ հաճելի թեմաներով եւ բոլորը նորմալ տվել են հարցազրույցները»:
Պետական ռեգիստրում կատարված բարեփոխումների արդյունքում, ներդրվել է 1 պատուհանը, որը էլեկտրոնային լինելով, հնարավորինս հեշտացրել է բիզնեսի եւ այլ ծառայությունների գրանցման հարցը:
Կարդացեք նաև
Լուսինե ԲՈՒԴԱՂՅԱՆ
