Հանդբոլի Հայաստանի կանանց ազգային հավաքականն այս տարի հանդես է գալու «Չելենջ տրոֆի» մրցաշարում, որն իր նշանակությամբ երկրորդն է Եվրոպայի առաջնությունից հետո:
Արդեն որոշվել են մրցավայրն ու մեր աղջիկների մրցակիցները: Մարտի 21-26-ը Բուլղարիայի Գաբրովո եւ Վելիկո Տերնովո քաղաքներում հյուրընկալվելու են «A» եւ «B» խմբերի մրցաշարերի մասնակիցները: Առաջինում ընդգրկվել են Ֆարերյան կղզիները, Իսրայելը, Էստոնիան եւ Մալթան, երկրորդում` Բուլղարիան, Լատվիան, Մոլդովան եւ Հայաստանը:
Հայաստանի հանդբոլի ֆեդերացիայի մամուլի ծառայությունը տեղեկացնում է, որ այս տարի մրցաշարի մրցակարգը փոխվել է: Սկզբում թիմերը խաղալու են խմբի իրենց մրցակիցների հետ, որից հետո ուժերը չափելու են մյուս խմբում միեւնույն տեղն զբաղեցրած ընտրանու հետ: Մեր աղջիկները մարտի 22-ից 24-ը հաջորդաբար հանդիպելու են Լատվիայի, Բուլղարիայի եւ Մոլդովայի հետ, իսկ հաջորդ օրը կհանդիպեն երկու խմբերի համապատասխան տեղերն զբաղեցրած հավաքականները:
Մրցաշարին նախապատրաստվող մեր կանանց ազգային հավաքականը, մարզիչ Աստղիկ Գյուրջինյանի ղեկավարությամբ մարզվում է Երեւանի տնտեսագիտական համալսարանի, Շենգավիթի եւ Արաբկիրի մարզադպրոցների դահլիճներում:
Կարդացեք նաև
Աշոտ ՀԱԿՈԲՅԱՆ
