«Առավոտի» տեղեկություններով, մոտ օրերս արդարադատության նախարարության ոչ առեւտրային կազմակերպությունների վերահսկողության բաժնի պետ Արսեն Բաբայանը կանցնի նոր աշխատանքի: Նա կնշանակվի Վճռաբեկ դատարանի միջազգային հարաբերությունների եւ հասարակայնության հետ կապերի ծառայության պետի պաշտոնին, որը միաժամանակ հանդիսանում է Վճռաբեկ դատարանի նախագահի մամլո քարտուղարը: Ըստ որոշ լուրերի, Վճռաբեկը որոշել է ուժեղացնել կապը լրատվամիջոցների եւ քաղաքացիական հասարակության հետ:
Նշենք, որ Արսեն Բաբայանը «Հրապարակին» այս կապակցությամբ ասել է. «Այդպիսի առաջարկ ստացել եմ, բայց հրաման չկա: Դեռ ոչինչ պարզ չէ»:
Արսեն Բաբայանը մինչ ԱՆ վերահսկողության բաժնի պետ նշանակվելը զբաղեցնում էր Քրեակատարողական վարչության հանրային կապերի բաժնի պետի պաշտոնը:
Ի դեպ, լուրեր կային, որ Արսեն Բաբայանը չի կարողացել հաղթահարել վերահսկողության բաժնի պետի համար անցկացված քաղաքացիական ծառայության մրցույթը: Այս մասին Aravot.am-ի հարցին ի պատասխան՝ արդարադատության նախարարի մամուլի քարտուղար Կարինե Քալանթարյանը հայտնեց, որ Արսեն Բաբայանն այդ մրցույթի հաղթող է ճանաչվել՝ բարձր արդյունքներով:
