Լոռու մարզի ընդհանուր իրավասության դատարանը, նախագահությամբ դատավոր Նարինե Հովակիմյանի, 2 տարվա ազատազրկման դատապարտեց Հայաստանի պետական ճարտարագիտական համալսարանի Վանաձորի մասնաճյուղի հեռակա ուսուցման բաժանմունքի վարիչ Հենրիկ Հակոբյանին: 64-ամյա Հենրիկ Հակոբյանը մեղադրվում էր խարդախությամբ՝ խաբեության կամ վստահությունը չարաշահելու եղանակով, կաշառք ստանալու պատրվակով, խոշոր չափերի հափշտակություն կատարելու մեջ: Վերջինս իր աշխատասենյակում խարդախությամբ կաշառք ստանալու պատրվակով Սարգիս Դիլբարյանից հափշտակել էր խոշոր չափի՝ 562.305 դրամին համարժեք 1500 ԱՄՆ դոլար: Նրա փաստաբան Ռուբեն Հակոբյանը համամիտ չէ նշանակված պատժատեսակի եւ պատժաչափի հետ, քանի որ, ըստ նրա, կային բոլոր հիմքերը իր պաշտպանյալի նկատմամբ տուգանք նշանակելու կամ պատիժը պայմանականորեն չկիրառելու համար:
«64 տարեկան գիտությունների թեկնածու, դոցենտ, նախկինում չդատված, դրական բնութագրվող, ամուսնացած, մեղքը ընդունած, խոստովանական ցուցմունք տված, քննությանը աջակցած անձնավորության նկատմամբ կարող էր կիրառվել մեղմ պատիժ»,- բացատրում է նա: Հենրիկ Հակոբյանի՝ համաձայնություն տալու դեպքում փաստաբան Հակոբյանը կայացրած որոշումը կվիճարկի ՀՀ վերաքննիչ դատարանում:
Ա. ԲՈՒԼՂԱԴԱՐՅԱՆ
«Առավոտ» օրաթերթ
