Երեկ Երեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում, դատավոր Ալվարդ Հունանյանի նախագահությամբ, սկսվեց քաղաքացիական գործն ըստ Արամ Չատինյանի հայցի՝ ընդդեմ Գագիկ Շամշյանի՝ պատիվը, արժանապատվությունը արատավորող տեղեկություններ տարածելու փաստով հերքում ներկայացնելու պահանջի վերաբերյալ:
Դատարան էր ներկայացել «Չորրորդ ինքնիշխանություն», «Առավոտ» թերթերի ֆոտոթղթակից Գագիկ Շամշյանը, ինչպես նաեւ հայցվորի ներկայացուցիչը՝ ՀՀ փաստաբանների պալատի անդամ, փաստաբան Արշակ Թովմասյանը:
Դատավոր Ալվարդ Հունանյանը տեղեկացրեց, որ Գագիկ Շամշյանի բնակության վայրի հասցեով ուղարկվել են ծանուցագրեր, սակայն այդ ծանուցագրերը վերադարձվել են: Դա էր պատճառը, որ դատարանը ծանուցագրի հետ հայցադիմումը մեր գործընկերոջը չէր ուղարկել: Ի դեպ, մեկ անգամ էլ ծանուցագրով ծրարը բացված վիճակով ուղարկվել էր «Առավոտ», ինչի մասին մենք արդեն տեղեկացրել ենք: Եվ քանի որ հայցն առնչվում էր պատվին ու արժանապատվությանը, հետեւաբար, անմեղության կանխավարկածի սկզբունքը հարգելով, դատարանը մինչ ֆոտոթղթակցի բնակության վայրը ճշտելը, հայցադիմումը չէր ուղարկել:
Դատական նիստը հետաձգվեց, քանի որ Գագիկ Շամշյանին հայցադիմումը ստանալուց հետո ժամանակ էր պետք՝ ծանոթանալու համար:
Կարդացեք նաև
Բացի այդ, հաջորդ նիստին Շամշյանը դատարան կներկայանա իր փաստաբանով եւ առարկություններով: Դատական նիստը նշանակվեց մարտի 23-ին, ժ.12-ին:
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
