Սիրելի հայրենակիցնե՛ր:
Մենք նորից համապետական ընտրությունների շեմին ենք և կրկին տագնապով են լցվում մեր հոգիները: Արդյոք կարո՞ղ ենք անկախությունից քսան տարի անց գոնե մեկ անգամ ազատ ընտրություն կատարել և ձևավորել ժողովրդի վստահությունը վայելող իշխանություն:
Ընդունելով Հայաստանի դեմոկրատական կուսակցության /ՀԴԿ/ առաջարկը, մենք` ներքոստորագրյալներս, որոշեցինք միասնաբար դիմել ձեզ, հարգելի հայրենակիցնե՛ր:
Մեր համոզմամբ առաջիկա ընտրությունները շրջադարձային են լինելու ժողովրդի, պետության համար: Կամ մենք փորձելու ենք նախադրյալներ ստեղծել նոր արդար կյանքով ապրելու, կամ…
Կարդացեք նաև
Անկախության տարիներին մեր պետականության արատը ժողովրդի և իշխանությունների միջև գոյացած վիհն է, աղետալի սոցիալական բևեռացումը, որի պատճառը ժողովրդից կողոպտած հասարակության մի մասի հարստության ոչ լեգիտիմ լինելն է: Ժողովուրդին, ըստ էության, չգոհացրեցին իշխանությունների քաղաքականության արդյունքները:
Հասարակական կյանքում աղավաղվել են բարոյական չափանիշները: Դիմախեղվել է մեր ազգային նկարագիրը, խաթարվել են հոգևոր արժեքները: Կոռուպցիայի և կաշառակերության դեմ պայքարը մինչ օրս իմիտացիոն բնույթ է կրում: Փաստացի, երկրում բացակայում է հասարակության վերահսկողությունը իշխանության թևերի նկատմամբ: Չի դադարում երկիրն արյունազրկող արտագաղթը: Պահն է, որ մենք` ՀՀ քաղաքացիներս, մեզ վայել արժանապատվությամբ, թոթափենք վախի զգացումը, չենթարկվենք ճնշումներին ու ընտրակաշառքի, սուտ խոստումների գայթակղություններին, թույլ չտանք, որ փորձեն մեզ պարտադրել /լինի դա գյուղապետ, թաղապետ, մարզպետ, օլիգարխ, քրեածին որևէ տարր/, որ մեր ձայնը այս կամ այն կերպ վաճառվի:
Դուք պետք է հավատաք ձեր ուժերին:
Հանուն իրական բարեփոխումների, հանուն ձեր և ձեր երեխաների ապագայի, ընտրությունը կատարեք ձեր կամքով և խղճի մտոք, գաղափարների և ծրագրերի, դրանք կրողների միջև, մասնագիտական բարձր որակավորում ունեցող, փորձառու ու բարձրաբարո քաղաքական այն ուժերի, այն գործիչների միջև, որոնք ձեր համոզմամբ ի զորու են ու պատրաստակամ արմատապես փոխելու իրավիճակը, ներկայացնելու ռազմավարական այն ծրագիրը, որի կենսագործումով Հայաստանը ձևավորվող աշխարհաքաղաքական նոր համակարգում կգտնի իր արժանի տեղը:
Հարգելի հայրենակիցնե՛ր: Ձեզանից վանեք ներշնչվող այն մտայնությունը, թե միևնույն է, ձեր ձայնից ոչինչ կախված չէ, որ իբր «վերևներից» ամեն ինչ կանխորոշել են և ոչինչ փոխել հնարավոր չէ: Հավատացեք, դա ձեզ հուսալքելու փորձված միջոց է:
Արդարության հաստատումը կախված է մեր հավաքական կամքից, «ԵՍ»-ից դեպի «ՄԵՆՔ»-ը գնալու վճռականությունից:
Այլևս հապաղել չի կարելի: Մեր երկիրը պետք է առաջատարների շարքում լինի:
Գտնում ենք, որ իշխանությունները, ՀՀ նախագահը, գիտակցելով պահի լրջությունը, կիսելով մեր մտահոգությունները, ընտրություններում մեր ժողովրդի կամարտահայտման համար կստեղծեն բոլոր պայմանները: Ընտրություններում հնի կրկնությունը, կեղծիքներով “հաղթելը”, կորստաբեր է և կործանարար:
Դիմելով Ձեզ, հարգելի ընտրող, հորդորում ենք` հետևել քարոզարշավին, համադրել ձեր պահանջները առաջարկողի բարոյական կերպարին` կայացնելու ինքնուրույն որոշում:
Ընտրեք, որ չպարտվեք: “ԵՍ” ` “ՄԵՆՔ”-ենք: Իսկ “ՄԵՆՔ” ` բացարձակ մեծամասնություն ենք:
ՎԼԱԴԻՄԻՐ ԽՈՋԱԲԵԿՅԱՆ – ԳԱԱ ակադեմիկոս,
ԼԵՆՍԵՐ ԱՂԱԼՈՎՅԱՆ – ԳԱԱ ակադեմիկոս,
ԴԱՎԻԹ ՍԵԴՐԱԿՅԱՆ – ԳԱԱ ակադեմիկոս,
ԱԶԱՏ ԵՂԻԱԶԱՐՅԱՆ – Բանասիրական գիտությունների դոկտոր, պրոֆեսոր,
ԷԼՄԻՐԱ ԳԵՎՈՐԳՅԱՆ – Բժշկական գիտությունների դոկտոր, պրոֆեսոր,
ԼԵՎՈՆ ՄԿՐՏՉՅԱՆ – Գիտությունների վաստակավոր գործիչ, բժշկական գիտ. ակադեմիայի նախագահ, Ռուսաստանի բժշկական գիտ. ակադեմիայի ակադեմիկոս,
ԱՐԹՈՒՐ ԻՇԽԱՆՅԱՆ – ԳԱԱ թղթակից անդամ,
ՍՊԱՐՏԱԿ ՂԱՄԲԱՐՈՎ – Բժշկական գիտությունների դոկտոր, պրոֆեսոր,
ՀՐԱՉՅԱ ՂԱԶԱՐՅԱՆ – Բեմադրիչ, ՀՀ վաստակավոր գործիչ,
ԺԱՆՆԱ ԹՈՐՈՍՅԱՆ – Հայաստանի մշակույթի աշխատողների ճյուղային արհմիությունների նախագահ,
ՀԵՆՐԻԿ ԳԱՐՈՒԿՅԱՆ – Գեղանկարիչ,
ԱՐԵՎՇԱՏ ԱՎԱԳՅԱՆ – Մշակույթի հայկական հիմնադրամի նախագահ,
ԼԵՈՆԻԴ ՀԱԽՎԵՐԴՅԱՆ – Երկրաբանական գիտությունների դոկտոր,
ԲՈՐԻՍ ՇԱՀՆԱԶԱՐՅԱՆ – Տնտեսական գիտությունների դոկտոր, պրոֆեսոր,
ՎԻԼ ՊՈՂՈՍՅԱՆ – Փիլիսոփայական գիտությունների դոկտոր, պրոֆեսոր,
ՌՈՒԲԵՆ ԲԱՐԵՆՑ – Բժկական գիտությունների թեկնածու, քաղաքագետ,
ԱՐՄԵՆ ՎԱԹՅԱՆ – Գրող, կինոսցենարիստ,
ԵՐՎԱՆԴ ՄԻՆԱՍՅԱՆ – Բժիշկ-սեքսապաթոլոգ,
ՀՈՎՀԱՆՆԵՍ ԱՅՎԱԶՅԱՆ – Լրագրող,
ԼՈՒՍՅԱ ՄԵՀՐԱԲՅԱՆ – “Էկոնոմիկա” ամսագրի հիմնադիր-խմբագիր,
ԱՐՏԱԿ ԴԱՎԹՅԱՆ – Տնտեսագետ,
ԱՐՄԵՆ ՀՈՎՍԵՓՅԱՆ – ԳԱԱ ամբիոնի վարիչ, պրոֆեսոր,
ՎԱՀԵ ՀԱՅՐԱՊԵՏՅԱՆ – Երգահան,
ԱՐԱՄ ԳՅՈՒՐՋՅԱՆ – Հոգեբանական գիտությունների թեկնածու, ռեժիսոր,
ՎԻԿՏՈՐ ՍՈԼԱԽՅԱՆ – Ֆիզիկոս-տեսաբան, հրապարակախոս, “Քաղաքացիական հասարակության զարգացման կենտրոն” հ/կ փոխնախագահ,
ՀՈՎՀԱՆՆԵՍ ԳՈՒՅՈՒՄՋՅԱՆ – Երկրաբանական գիտությունների թեկնածու, դոցենտ,
ՌԱՖԱՅԵԼ ԱԴԱՄՅԱՆ – Դերասան,
ԱՐՄԵՆ ՄԱՐԳԱՐՅԱՆ – Ճարտարագետ,
ՍՈՒՐԵՆ ՍԱՐԳՍՅԱՆ – տնտեսագետ, հրապարակախոս,
ՍՈՒՐԵՆ ՄՈՎՍԻՍՅԱՆ – Քաղաքագետ-դիվանագետ,
ՍԵՐԺ ԼԵՎՈՆՅԱՆ – Մանկավարժ,
ԴՈՒՍՏՐԻԿ ՄԽԻԹԱՐՅԱՆ – Մաթեմատիկոս,
ԵԿԱՏԵՐԻՆԱ ՍԻՄՈՆՅԱՆ – “Համագործակցություն” կանանց հասարակական կազմակերպություն
