Այսօր՝ փետրվարի 21-ին, ճանապարհային ոստիկանության հետաքննչական բաժնի աշխատակիցների բացատրական աշխատանքների արդյունքում ՃՈ է ներկայացել «ջիպ» մակնիշի 10 ՏՏ 045 համարանիշի ավտոմեքենայի սեփականատերը։ Ինչպես «Առավոտին» հայտնում է ֆոտոլրագրող Գագիկ Շամշյանը, ավտոմեքենայի սեփականատերը հետաքննիչին հայտնել է, որ իր մեքենան, որը վարում էր իր ընկերը, փետրվարի 18-ին Շիրազի փողոցում դուրս է եկել հանդիպակաց գոտի, հարվածել Երևանի բնակիչ, 69-ամյա Մաքսիմ Գալստյանի վարած «Ֆոլքսվագեն» մակնիշի 30 ՍՕ 186 համարանիշի ավտոմեքենային, այնուհետև հեռացել վթարի վայրից։
Ինչպես փետրվարի 18-ին դեպքի վայրից «Առավոտին» հայտնել էր ֆոտոլրագրող Գագիկ Շամշյանը, Շիրազի փողոցում «ջիպ» մակնիշի 10 ՏՏ 045 համարանիշի ավտոմեքենան, դուրս գալով հանդիպակաց գոտի, հարվածել էր Երևանի բնակիչ, 69-ամյա Մաքսիմ Գալստյանի վարած «Ֆոլքսվագեն» մակնիշի 30 ՍՕ 186 համարանիշի ավտոմեքենային և դիմել փախուստի։
Դեպքի վայրում հավաքվածները ֆոտոլրագրողին պատմել էին, որ վթարից հետո ջիպի վարորդը մոտեցել էր վթարի վայրին և քմծիծաղ տալով՝ հեռացել։ Կատարվածի մասին ֆոտոլրագրողը հայտնել էր դեպքի վայր ժամանած Երևանի ՃՈ աշխատակիցներին։
Հավաքվածները պատմել էին, որ այդ ջիպը պատկանում է ԵԿՄ վարչության նախագահ Մանվել Գրիգորյանի սանիկին։
