Արթիկի պատվավոր քաղաքացի, Շիրակի մարզպետ Աշոտ Գիզիրյանն այսօր իր շքախմբի հետ շրջել է Արթիկի դպրոցներում: Ըստ ականատեսների, նա զննել է բոլոր դպրոցների բոլոր անկյունները, անգամ ճաշարաններն ու զուգարանները` ճշտելու, թե ի՞նչ խնդիրներ ունեն տվյալ կառույցները: Հետաքրքիրն այն է, որ արթիկցի տնօրենները լեղապատառ սպասել են, թե այս անգամ ո՞ր տնօրենին ոտքի վրա պաշտոնաթող կանի գեներալ մարզպետը, սակայն այդպիսի փաստ, բարեբախտաբար, չի գրանցվել:
Հիշեցնենք, որ Շիրակի մարզ ոտք դնելուն պես` մոտ երկու տարի առաջ, Գիզիրյանը լրագրողների հետ համատեղ շրջայց կատարեց իր հայրենի Արթիկ քաղաք ու ոտքի վրա ազատեց 6-րդ դպրոցի տնօրեն Ռոբերտ Աղաբաբյանին: Պատճառն այն էր, որ դպրոցի տնօրենը աշխատանքի ժամին տեղում չէր, այնտեղ ներքին հարդարման աշխատանքներ էին կատարվում, սակայն դասասենյակների առաստաղները փնթի ձևով էին հարդարել: Շիրակի մարզպետարանի կրթության վարչության պետ Սահակ Մինասյանը aravot.am- ին փոխանցեց, որ մարզպետը եղել է ոչ միայն Արթիկի դպրոցներում, այլեւ Գյումրիի ու գյուղերի, ընդհանուր հաշվով` մոտ 100 կառույցում, որից 30-ը Գյումրիում, 70-ը` գյուղերում: «Թեև ես որպես կրթության վարչության պետ, կամ Ալբերտ Մարգարյանը` որպես քաղաքաշինության վարչության պետ, պարոն Գիզիրյանին անընդհատ ներկայացնում ենք այս կամ այն դպրոցի խնդիրները, սակայն նա գնում, տեղում համոզվում է, գերադասում է իր աչքով տեսնել, մանկավարժներից այս մասին ճշտել ու սեփական դիտարկումներն անել:Ասեմ, որ շատ էֆեկտիվ են այս այցերը, նա ի վերջո պիտի ճշտի, թե որտեղ օգտագործի առաջին պետական միջոցը, օրինակ այսօր հանդիպեց Արթիկի ավագանուն ու քննարկման դրեց`առաջին պետական միջոցը օգտագործել փողոցի՞, տանիքի՞, թե՞ դպրոցի վերանորգման համար: Ի վերջո նա պիտի լսի առաջարկությունները, որպեսզի կարողանանք մարզից շինարարական ճիշտ ծրագիր ներկայացնել, բացի այդ դա մարզպետի առավելությունն է, որ նա մանկավարժների հետ ուղիղ կոնտակ ունի», – իր ղեկավարին այսպես գովեց վարչության պետը:
Իսկ մարզպետը ձեռքի հետ քաղաքական թեմաներ չի շոշափու՞մ, ասենք, նախագահի կամ ՀՀԿ-ի գովազդը չի անու՞մ, մեր այս հարցին պարոն Մինասյանը պատասխանեց. «Բացարձակապես, մենք արդեն հանդիպել ենք մարզի 3000 մանկավարժի, կարող եք գնալ ու նրանցից ճշտել, ես ձեզ վստահորեն եմ ասում»:
Նունե ԱՐԵՎՇԱՏՅԱՆ
