ՀՌԱՀ նախկին անդամ Մուշեղ Հովսեփյանը բողոքում է հեռուստաեթերից
Այսօր Մայրենի լեզվի օրվա առթիվ կազմակերպած միջոցառումների շրջանակում ՀՀ սփյուռքի նախարարությունը Երևանի պետական համալսարանի (ԵՊՀ) հետ համատեղ անցկացրեց «Հեռուստատեսությունը եւ հասարակությունը» խորագրով գիտաժողով: Գիտաժողովը կայացավ ԵՊՀ ժուռնալիստիկայի ֆակուլտետի Չարենցի անվան դահլիճում:
«Բակային, ժարգոնային արտահայտությունները մեր հեռուստատեսությունների թեթեւ ձեռքով ներխուժեցին հայկական եթեր: Այժմ գլոբալիզացիայի պայմաններում մայրենիի պահպանման խնդիրն ավելի արդիական է դարձել: Հրատապ լուծում է պետք»,- փաստեց ԵՊՀ ժուռնալիստիկայի ամբիոնի վարիչ Մուշեղ Հովսեփյանը:
Ի թիվս այլոց, զեկույցով հանդես եկավ նաեւ ԵՊՀ հայ բանասիրության ֆակուլտետի հայոց լեզվի պատմության ամբիոնի վարիչ Ռուբեն Սաքապետոյանը եւ նշեց, որ լավ բան է նկատել մեր եթերում` ավելի շատ է սկսել հնչել մայրենին: «Անգրագիտության առաջ պետք է փակել: Պետք է մտցնել գրաքննություն անգրագիտության դեմ և ոչ թե գաղափարների»,-հավելեց պարոն Սաքապետոյանը: Նրա ելույթի ընթացքում դահլիճում հայտնվեցին երիտասարդներ` «Հեռուստատեսությունը ճաշակ է թելադրում», «Պարգեւեք մեզ անվտանգ եթեր», «Հեռուստասերիալները զոմբիացնում են», «Մի խախտեք մեր իրավունքը» պաստառներով: Գիտաժողովի կազմակերպիչները նրանց անմիջապես հեռացրեցին դահլիճից՝ քանի որ պաստառների վրա կային մի շարք ուղղագրական սխալներ:
Անի ՄԿՐՏՉՅԱՆ
Կարդացեք նաև
