Այսօր «Նովոստի» միջազգային մամուլի կենտրոնում տեսակամուրջի ձևաչափով տեղի ունեցած մամուլի ասուլիսի ժամանակ ՀԱՊԿ գլխավոր քարտուղար Նիկոլայ Բորդյուժան լրագրողների խնդրանքով անդրադարձավ այն հարցին, թե արդյոք ձեռք բերված պայմանավորվածության համաձայն` ՀԱՊԿ-ն կարո՞ղ է միջամտել նաև հայաստանյան ներքաղաքական կյանքին` անվտանգության ապահովման նպատակով: Ն. Բորդյուժան պատասխանեց. «Եթե ազգային կարգապահություն սահմանող օղակները չեն կարողանում կարգուկանոն հաստատել երկրում, պետության սահմանների ներսում ստեղծվում է քաոս, տեղի են ունենում զանգվածային անկարգություններ, ապա ՀԱՊԿ-ի կոնսենսուսային որոշմամբ հնարավորություն կա օգտագործելու ՀԱՊԿ-ի ուժերը երկրում կարգուկանոն հաստատելու նպատակով: Այդպիսի պայմանավորվածություն կա, որի ուղղությամբ մենք աշխատում ենք: Բայց ՀԱՊԿ-ը ոչ թե խառնվելու է, որ որոշումներ կայացնի, կամ ընդդիմության դեմ պայքարի, այլ երկրում կարգուկանոն հաստատելու, քաղաքացիների անվտանգությունն ապահովելու համար: ՀԱՊԿ-ը ժանդարմային ֆունկցիաներ չի իրականացնելու, և սա փորձ չէ ՀԱՊԿ-ն օգտագործել քաղաքական պայքարի համար»:
Տաթև ՀԱՐՈՒԹՅՈՒՆՅԱՆ
