Հավաստիացնում է մոսկվաբնակ բալետմայստեր Հարություն Դավթյանը
Հարություն Դավթյանը (աջից)՝ Լարա Ֆաբիանի եւ Իշխան Գասպարյանի հետ:
Մի խումբ ճանաչված արվեստագետներ՝ Վանուշ Խանամիրյանը, Ռոբերտ Ամիրխանյանը, Երվանդ Ղազանչյանը, Նիկոլայ Ծատուրյանը, Նորայր Մեհրաբյանը եւ ուրիշներ միշտ էլ մասնագիտական աջակցություն են ցուցաբերել Սփյուռքում գործող հայկական թատերախմբերին ու պարախմբերին: Ձեւավորված ավանդույթները շարունակվում են նաեւ այսօր, առիթ ընձեռելով մի շարք հայաստանցի երիտասարդ արվեստագետների՝ իրենց ստեղծագործական կենսագրության մի մասը կապել գաղթավայրերի մշակութային կյանքին:
Ներկայումս Ռուսաստանի Դաշնությունում, կոնկրետ՝ Մոսկվայում է ստեղծագործում տեղի ամենամեծ պարարվեստի «Հովիկ» ստուդիայի եւ նույնանուն պարային անսամբլի գլխավոր բալետմայստեր Հարություն Դավթյանը: Նա 2001-08թթ. հանդիսացել է Հայաստանի պարի պետական եւ «Բարեկամություն» անսամբլների մենակատար, 2009-ից ապրում ու ստեղծագործում է Մոսկվայում, իր խոսքերով՝ առանց բեմը թողնելու: Հարություն Դավթյանը «Առավոտի» հետ զրույցում ասաց, որ հրավերը ստացել է «Հովիկ» ստուդիայի գեղարվեստական ղեկավար Իշխան Գասպարյանից: Հավելեց, որ հիշյալ մշակութային կենտրոնը Ռուսաստանի ամենամեծ հայկական հաստատությունն է (Մոսկվայում գործում են 6 պարային անսամբլներ). «Մեզ մոտ ուսուցանվում են դասական, հայկական ժողովրդական, տարբեր ազգերի եւ ժամանակակից (մոդեռն, ջազ եւ այլն) պարեր: Ուսուցումը տարվում է տարիքային տարբեր խմբերում: Մեր գերնպատակն է հավուր պատշաճի սովորողներին պատրաստել հայկական պար ցուցադրելու: Թեեւ ամեն ինչ դրված է պրոֆեսիոնալ հիմքերի վրա, սակայն մեր խնդիրը այն չէ, որ ուսումն ավարտելուց հետո սովորողներից ոմանք աշխատանքի անցնեն, օրինակ՝ Մոիսեեւի անվան կամ «Բերյոզկա» պարային անսամբլներում»: Դիտարկմանը, թե Ռուսաստանում գործող որոշ նմանատիպ հայկական օջախներում ուսման վարձը սահմանված է 500 ռուբլի, մինչդեռ իրենց մոտ՝ 10 անգամ ավելի, մեր զրուցակիցը պատասխանեց. «Մեր ստուդիայում վարձն իսկապես 5000 ռուբլի է, պատճառն էլ պարին պրոֆեսիոնալ մոտեցումն է»: Հարություն Դավթյանը հավելեց, որ փորձերն ու բեմադրությունները իրականացնում են 8 պարուսույցներ՝ Հայաստանից: Անցյալ տարի ստուդիայի նախաձեռնությամբ առաջին անգամ Մոսկվայում անցկացվել է «Էվրիթմիա» փառատոնը՝ Ռուսաստանում գործող տարբեր ազգերի անսամբլների մասնակցությամբ:
Հարցին, թե փառատոնին մասնակցո՞ւմ էր ադրբեջանական պարային անսամբլ, բալետմայստերը նախ ասաց, թե Մոսկվայում ադրբեջանական ոչ մի պարային խմբի չի հանդիպել, հետո էլ ավելացրեց. «Ադրբեջանցիների հանդիպել եմ տաքսու վարորդների կարգավիճակում»:
Կարդացեք նաև
Խոսելով «Հովիկ» պարային անսամբլի մասին՝ Դավթյանը նշեց, որ կոլեկտիվը մեծ պահանջարկ է վայելում տեղի շոու-բիզնեսի, ինչպես նաեւ Սփյուռքից ժամանած երգիչ-երգչուհիների հետ հանդես գալու առումով:
Հրավեր ստանո՞ւմ են մոսկվաբնակ հայ մեծահարուստներից՝ խնջույքներին հայկական շունչ տալու համար: Արվեստագետը պատասխանեց. «Հրավիրում են հարսանիքների, կնունքների, ծնունդների, նշանադրության երեկոների: Ուզում են տեսնել «Բերդը», «Շալախոն» եւ այլ հայկական սիրված պարեր: Սիրով ենք մասնակցում: Ինչո՞ւ մերժել մեր հայրենակիցներին, եւ չցուցադրել մեր արվեստը նաեւ նման միջոցառումներին ներկա այլազգի հյուրերին…»:
Հարություն Դավթյանը պատմեց, որ անցյալ տարի հայաստանյան պարարվեստի երկու միություններից մեկի նախագահը մեկնել էր Մոսկվա եւ ուզում էր հայկական պարարվեստի միություն հիմնել Ռուսաստանում: «Ոչ միայն մենք, այլեւ մյուս պարային կոլեկտիվների բալետմայստերները մեր համերկրացուն չընդառաջեցին: Նրան դիվանագիտորեն հակադարձեցինք, ասելով՝ մեր գործը մենք լավ գիտենք. հարկավոր չէ Երեւանից Մոսկվան կառավարել»,- ասաց Հ. Դավթյանը:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
