ՀՀ ոստիկանության Շիրակի քննչական բաժնում հարուցվել է քրեական գործ՝ Գյումրիի մի քանի բնակիչների՝ Թուրքիայում սեռական շահագործման ենթարկելու դեպքի առթիվ: Երկու անձ կալանավորվել են, իսկ գործը ուղարկվել է ՀՀ ոստիկանության քննչական գլխավոր վարչություն: Պարզվել է, որ երեւանցի, Թուրքիայում ժամանակավոր բնակվող, «Դոկտոր» մականվամբ Ս. Մարտիրոսյանը հավաքագրել է Գյումրիի բնակչուհու (զոհերի անունները չենք հրապարակի-Ռ. Մ.) եւ 2010թ. օգոստոսին տեղափոխել է Տրապիզոն քաղաք:
Տրապիզոն հասնելուն պես՝ Ս. Մարտիրոսյանը մեկ այլ հայի՝ Ն. Մովսիսյանի միջոցով գյումրեցի զոհին հանձնել է ազգությամբ թուրք, կավատ ոմն Սաֆայի: Վերջինս 4 օր տեւողությամբ օրական 20 ժամ Ն. Մովսիսյանին եւ կնոջը ենթարկել է սեռական շահագործման, իսկ ստացված գումարները տվել Ս. Մարտիրոսյանին: Ն. Մովսիսյանը եւ զոհը հրաժարվել են զբաղվել մարմնավաճառությամբ, իսկ կավատ Սաֆան նրանց հանձնել է Թուրքիայի ոստիկանությանը, որի արդյունքում նրանք արտաքսվել են Թուրքիայից: Նախաքննության տվյալներով՝ Ս. Մարտիրոսյանը շարունակել է Ն. Մովսիսյանից պահանջել պարտքը վերադարձնել, իսկ չունենալու դեպքում հավաքագրել եւ Թուրքիա տեղափոխել այլ աղջիկների՝ սեռական շահագործման համար: Ձեռք բերված ապացույցների համաձայն՝ Ն. Մովսիսյանը խաբեությամբ, դայակություն կատարելու պատրվակով հավաքագրել եւ 2011թ. օգոստոսի 4-ին Տրապիզոն է տեղափոխել գյումրեցի մեկ այլ աղջկա:
Ս. Մարտիրոսյանը, օգտվելով նոր զոհի խոցելի վիճակից, պարտադրել է նրան Թուրքիայում մարմնավաճառությամբ զբաղվել՝ պատճառաբանելով, թե վերջինս իրեն պարտք է շուրջ 5000 ԱՄՆ դոլար՝ ճանապարհածախսի, հագուստի եւ բնակության վայր տրամադրելու դիմաց:
Աղջնակը 2011թ. օգոստոսից մինչեւ նույն թվականի դեկտեմբերի 1-ը Տրապիզոնի «Իշիկ» հյուրանոցում զբաղվել է մարմնավաճառությամբ, որից ստացված գումարների զգալի մասը վերցրել է Ս. Մարտիրոսյանը: Ավելի ուշ հայուհին նույնպես արտաքսվել է Թուրքիայից: 2012թ. փետրվարի 14-ին Ն. Մովսիսյանին եւ Ս. Մարտիրոսյանին մեղադրանք է առաջադրվել ՀՀ քրեական օրենսգրքի 132-րդ հոդվածի 2-րդ մասի 1-ին եւ 2-րդ կետերով:
Կարդացեք նաև
«Առավոտ» օրաթերթ
