Լուսանկարը՝ https://urikhanyan.wordpress.com-ից
«Բարգավաճ Հայաստան» կուսակցությունն առաջիկա խորհրդարանական ընտրություններին լուրջ ծրագրով է ներկայանալու»,- Aravot.am-ի հետ զրույցում ասաց ԲՀԿ քաղաքական խորհրդի անդամ Տիգրան Ուրիխանյանը` պատասխանելով հարցին ի՞նչ հարցեր են քննարկվել շաբաթ օրը Երեւանի կոնյակի գործարանի հարեւանությամբ գտնվող կուսակցության կենտրոնական գրասենյակում տեղի ունեցած հավաքի ժամանակ, որին ներկա են եղել նաեւ Ռուսաստանի Դաշնությունից հրավիրված մասնագետներ:
Մեր զրուցակիցը, որը մասնակցել էր սույն հավաքին, մանրամասնեց, թե մասնագետները եղել են ոչ միայն ՌԴ-ից. «Հրավիրված էին տարբեր երկրներից համաշխարհային ճանաչում ունեցող տնտեսագետներ, ինչպիսիք են պրոֆեսոր Կրիսովատինը, Բրինբերգը եւ այլք»:
Բավականին երկար տեւած քննարկումների ժամանակ` լսելով այդ մարդկանց տեսակետները եւ ներկայացնելով սեփական առաջարկներն ու մոտեցումները, փորձ է արվել հայաստանյան տնտեսությունը «փրկելու» ճանապարհներ գտնել: Ձեւավորվել են աշխատանքային խմբեր, որոնք վերլուծությունների արդյունքում կներկայացնեն կոկրետ առաջարկներ: Դրանք տեղ կգտնեն ԲՀԿ-ի նախընտրական ծրագրում:
Մեր զրուցակցի մատուցմամբ` խնդիր կա առաջարկները հայաստանյան իրականության հետ համապատասխանեցնելու: «Օրինակ, առաջարկ կա մանր բիզնեսին ժամանակավոր ազատել եկամտային մասով հարկերից` պահպանելու համար այդ ընկերությունները, որոնք նաեւ աշխատատեղեր են ստեղծում: Եթե պետությունն ինքը չի կարողանում աշխատատեղերի խնդիրը լուծել, ուրեմն պետք է ամեն ինչ անել, որպեսզի այս կերպ գոնե խնդրին լուծում տալ: Բայց մեր իրականության հետ հակասող խնդիրներ կան. ասենք` այդ դեպքում ինչպե՞ս են լրացվելու պետբյուջե մտնող գումարները եւ այլն»,– ասաց մեր զրուցակիցը` հավելելով, որ այս քննարկումների արդյունքում ԲՀԿ-ն խորհրդարանական ընտրություններին հանրությանը ներկայանալու է լուրջ ասելիքով:
Կարդացեք նաև
Հարցին` ԲՀԿ-ում չե՞ն քննարկում տարբերակներ, թե ինչպե՞ս խոշոր բիզնեսը հարկային դաշտ բերել, մեր զրուցակցի արձագանքը եղավ. «Բիզնեսը պետք է լինի հարկային դաշտում. Դա ի՞նչ քննարկելու բան է»: Դիտարկմանը, որ ցավոք, հայաստանյան իրականության մեջ ոչ բոլոր գործարարներն են բարեխիղճ հարկատուներ, համաձայնեց, բայց այլ մեկնաբանություններ չարեց:
Նելլի ԳՐԻԳՈՐՅԱՆ
