Այսօր Մաշտոցի այգում «Ժառանգության» պատգամավոր Անահիտ Բախշյանը ոստիկանության փոխգնդապետ Կարեն Մովսիսյանին բացատրում էր, որ ինքը եկել է, «որ երեխեքը չվնասվեն»: Տիկին Բախշյանի դիտարկմանը, որ շինաշխատանքներն օրինական չեն, ոստիկանը պատասխանեց. «Ընդունում եմ ձեր ասածը: Ենթադրենք, մի անօրինականություն թույլ է տրվել, հիմա արդյոք որեւէ մեկին իրավունք վերապահե՞նք հաջորդ անօրինականությունն անել»:
Ըստ ոստիկանի, անօրինականություն է նաեւ ուրիշի տարածքը վնասելը, ուրիշի գույքին՝ տաղավարին ոտք դնելը:
Ոստիկանները վստահեցնում էին, որ իրենք հակված չեն բախման, իսկ տիկին Բախշյանը նկատեց. «Դուք բարձր հասարակությանը սազական ոստիկան եք, որ բախումը թույլ չեք տվել»:
Կարեն Մովսիսյանի ներկայացմամբ «գեղեցիկ զրույցը» ակտիվիստների հետ նրա համար է, որ գան մի ընդհանուր եզրակացության. «Ժողովուրդ ջան, ես չեմ կարող համակարծիք չլինել այս ամեն ինչի հետ, բայց մի որեւէ անօրինականության դեմ պայքարելու ժամանակ չի կարելի շարք անօրինականությունների գնալ»:
Կարդացեք նաև
Կ. Մովսիսյանը պարբերաբար ասում էր, որ չունեք կազմակերպիչ, չունեք առաջնորդ, ինքնաբուխ ակցիա է, խախտում եք օրենքը: Ակտիվիստներից մեկը նրան ասաց՝ «Պարոն Մովսիսյան, я Спартак», իսկ Կարեն Մովսիսյանը պատասխանեց. «Հասկացանք, я тоже Спартак, բայց չի կարելի ամեն ինչը շրջանցել, սա հանգեցնելու է վերջը վատ բանի»:
Հռիփսիմե ՋԵԲԵՋՅԱՆ
