Այսօր «Պոստ Սկրիպտում» մամուլի ակումբում ԱԺ Տնտեսական հարցերի մշտական հանձնաժողովի նախագահ Վարդան Այվազյանը, գնահատելով ներքաղաքական ներկայիս իրավիճակը, անդրադարձավ մեծամասնական-համամասնական ընտրակարգին վերաբերող քննարկումներին: Դրանք նա որակեց՝ որպես շահարկումներ, իսկ հարցը շահարկող քաղաքական ուժերի մասին նշեց, որ լավ կլիներ ժամանակին մասնակցեին քննարկումներին, ոչ թե նախընտրական շրջանում սկսեին խոսել այդ մասին:
Գործարարների՝ խորհրդարանում հայտնվել-չհայտնվելու առնչությամբ Վ.Այվազյանը նշեց. «Իսկ բիզնեսմենները ինչո՞ւ չպիտի լինեն խորհրդարանում: Գործարարությունը հանցագործություն չէ: Օրինակ՝ իմ ղեկավարած հանձնաժողովում երևի ամենից շատն են գործարար պատգամավորները, 20 գլուխ չեն, այլ 20 հոգի, և մարդիկ շատ լավ աշխատում են: Ի վերջո, ոնց կարող ես թույլ չտալ մարդուն առաջադրվել: Միևնույն է, եթե մեծամասնականով էլ չլինի, ապա համամասնականով ո՞նց կարող ես սահմանափակել նրանց՝ ԱԺ հայտնվելը»:
Պարոն Այվազյանը քաղաքական դաշտում անակնկալներ չի կանխատեսում: Վստահ է, որ ֆավորիտը լինելու է ՀՀԿ-ն: Ըստ նրա՝ խորհրդարանում կհայտնվեն ԲՀԿ-ն, ՀԱԿ-ը, ՕԵԿ-ը, ՀՅԴ-ն:
Ռոբերտ Քոչարյանի՝ քաղաքականություն վերադարձը քիչ հավանական է համարում, իսկ նախկին ԱԳ նախարար Վարդան Օսկանյանի՝ ԲՀԿ անդամակցության մասին ասաց. «Մարդը ցանկանում է քաղաքական գործունեություն ծավալել, ԲՀԿ-ն էլ որոշում է կայացրել, ուստի ինչ է պատահել: Չեմ կարծում, թե Հանրապետական կուսակցությունը դրան խանդով է վերաբերվում, քանի որ նա ունի իր ներուժն ու ռեսուրսները»:
Տաթև ՀԱՐՈՒԹՅՈՒՆՅԱՆ
