«Էսօր կյանքիս ամենաերջանիկ օրն ա, վերջապես տղես կծնվի ու իրա ծնունդով ես ինձ լիարժեք մարդ կզգամ»,- անկեղծաբում է ծննդատան ընդունարանում սպասող Արմեն Մարգարյանը: 5 տարի է` նա եւ կինը երեխա չեն ունենում:
Մանկաբույժ-գինեկոլոգ Կիմա Մարտիրոսյանի խոսքով` առողջ երեխա ունենալու համար կինը պետք է հղիության առաջին եռամսյակից սկսած գտնվի բժշկի հսկողության տակ: Հետագա բարդություններից խուսափելու համար մանկաբույժը խորհուրդ է տալիս անպայման լիարժեք հետազոտվել, նախապես իմանալ` ինչ հիվանդություններ կամ ախտաբանական խնդիրներ ունի հղին, որոնցով էլ պայմանավորված կլինի` շարունակե՞լ, թե՞ ընդհատել հղիությունը:
Բժշկին դիմելու, խորհրդատվության գնալու պարբերականությունը կախված է հղի կնոջ վիճակից, ինքնազգացողությունից: Այսինքն` եթե կնոջ մոտ խնդիրներ չկան և հղիությունը նորմալ է ընթանում, բժշկին հաճախ դիմելու անհրաժեշտություն չկա:
«Ես ինձ շատ լավ եմ զգում և ոչ մի բողոք չունեմ, ուղղակի ապահովության համար 2 ամիսը մեկ գալիս եմ կոնսուլտացիայի»,- նշում է 32 շաբաթական հղի Աննան:
Բժշկի խոսքով` շատ կարևոր է, թե կնոջ մոտ որերորդ հղիությունն է: «Եթե առաջինն է, և ոչ մի խնդիրն չկա, այսինքն` դասվում է ցածր ռիսկի խմբում, բնականաբար, խիստ հսկողության կարիք չկա,- ասում է Կ. Մարտիրոսյանը` ավելացնելով,- լուրջ հսկողության կարիք ունեն, օրինակ` կրկնածին կանայք, որոնք առաջին հղիության ժամանակ բարդություններ, վիժումներ կամ արհեստական ընդհատումներ են ունեցել»:
Մանկաբույժը կանանց խորհուրդ է տալիս միշտ հիշել, որ իրենք հիվանդ չեն, որ հղիությունը հիվանդություն չէ, այլ ֆիզիոլոգիական գործընթաց և հավելում,- «Իհարկե կան որոշակի պահանջներ` մաքուր օդ, ճիշտ սնունդ` վիտամիններով, մրգերով, բանջարեղեններով հարուստ, բայց այնուամենայնիվ հղի կինը պետք է շարունակի իր բնականոն կյանքը, իր կենսակերպը»:
Այսօր արդեն երեխան և մայրը գտնվում են համատեղ կեցության պայմաններում, այսինքն` ծննդից անմիջապես հետո մայրը կարող է գրկել փոքրիկին, բացառությամբ այն դեպքերի, երբ ծննդաբերությունից հետո առողջական խնդիրներ են լինում մոր կամ երեխայի մոտ: Մանկաբույժ-գինեկոլոգի խոսքով` հիմա շատ ընդունված է նաև վաղ դուրսգրումը. «Եթե մոր կամ երեխայի մոտ ոչ մի խնդիր, ոչ մի գանգատ չկա, 3 օր հետո կարող են դուրս գրվել»:
Մինչ մենք զրուցում էինք մանկաբարձուհու հետ, ընդունարանում սպասող Արմեն Մարգարյանը դարձավ հայր:
Ռուզան Ասատրյան
