Մի առիթով բրիտանական թագավորական համալսարանի տնօրեն, կոմսուհի Գրինֆիլդը հայտարարել էր, որ եթե մարդը չափից դուրս երկար ժամանակ է անցկացնում համակարգչի դիմաց, նրա մոտ ֆիզիոլոգիապես փոխվում է ուղեղը, ինչը հանգեցնում է պահելաձեւի եւ ուշադրության հետ կապված խնդիրների:
Համակարգչի մոտ երկար նստելն առավել վատ է անդրադառնում փոքրիկների վրա. այս մասին վկայում են նաեւ հոգեբանները: Ըստ նրանց, բացի այն, որ համակարգչից երեխաների մոտ տեսողության հետ կապված խնդիրներ են առաջանում, խաղերի պատճառով էլ մեծանում է սարսափ-երազներ տեսնելու հավանականությունը: Այս մասին ճապոնացի մասնագետները դեռ 10 տարի առաջ էին նախազգուշացնում՝ հայտարարելով, որ համակարգչային խաղերը վնասում են ուղեղի այն գործառույթները, որոնք պատասխանատու են երեխաների տեսողության ու շարժումների համար: Համակարգչային խաղերը «նպաստում» են նաեւ երեխաների ուղեղի թերզարգացածությանը:
Հոգեբաններից բացի՝ երեխաների առողջությամբ անհանգստացած կոմսուհին եւս նշել էր, որ դրանք կարող են ապաակտիվացնել ուղեղի նյարդային որոշակի կապեր, քանի որ ուղեղը հարմարվում է արտաքին միջավայրի փոփոխություններին: Համակարգչային խաղերը նոր միջավայրի օրինակ են հանդիսանում: Երեխաները բավականին շատ ժամանակ են անցկացնում համակարգչի առջեւ: Իսկ նոր միջավայրը՝ «խաղային աշխարհը» թմրեցնում, բթացնում է ու վառվռուն գույներից բացի՝ ոչինչ չի տալիս:
Aravot.am-ի հետ զրույցում հոգեբան Լիլիթ Սարգսյանը նշեց. «Համակարգչային խաղերն առնվազն ագրեսիա են ծնում, երեխան դրանցից ոչինչ չի սովորում: Իսկ փոքրիկներին ինչ-որ բանով զբաղեցնելը պետք է անպայման նպաստավոր լինի. Այսինքն` երեխան պետք է ոչ միայն պարապ ժամանակն անցկացնի, այլեւ մի նոր բան սովորի: 11-12 տարեկան հասակում երեխաներն անընդհատ ինֆորմացիայի կարիք են ունենում, ու պետք չէ նրանց ուղեղը ծանրաբեռնել անիմաստ «անպտուղ» զբաղմունքով, խաղերով: Փոխարենը պետք է նրանց ուղեղի զարգացման, աճի ու առողջ ապրելակերպի մասին հոգ տանել, օրինակ լողի, սպորտի, արվեստի հետ կապված պարապմունքների տանել»:
Կարդացեք նաև
Հոգեբանը հավելեց՝ անհրաժեշտ է երեխաներին հեռու պահել էլեկտրամագնիսական ճառագայթներից. մեծահասակներին էլ խորհուրդ տվեց խուսափել սրտանոթային համակարգի, ստամոքսաաղիքային տրակտի խանգարումներից, ճարպակալումից, ողնաշարի ծռությունից եւ շատ այլ հիվանդություններից՝ անքուն գիշերներ ու անիմաստ ժամեր չանցկացնելով համակարգչի մոտ նստած:
Եվա ՀԱԿՈԲՅԱՆ
