Երեկ ՝ ժամը 15:15-ին, Կենտրոն եւ Նորք-Մարաշ վարչական շրջանների ընդհանուր իրավասության դատարանում (դատավոր՝ Ռ. Ներսիսյան) շարունակվեց արդարադատության նախարարության «Վանաձոր» ՔԿՀ-ում բժշկի կողմից իր մասնագիտական պարտականությունները ոչ պատշաճ կատարելու հետեւանքով մահացած Սլավիկ Ոսկանյանի իրավահաջորդի ներկայացուցիչներ Էդմոն Մարուքյանի եւ Կարեն Թումանյանի բողոքի քննությունը:
Վերջինները պահանջում են վերացնել Հատուկ քննչական ծառայության ՀԿԳ ավագ քննիչի կողմից քրեական գործի վարույթը կարճելու եւ քրեական հետապնդում չիրականացնելու մասին որոշումները: Հիշեցնենք, որ 2010թ. դեկտեմբերի 30-ին ՀՀ ոստիկանության Լոռու մարզի քննչական բաժնում հարուցվել է քրեական գործ: «Վանաձոր» ՔԿՀ-ի կալանավոր Սլավիկ Ոսկանյանը հոկտեմբերի 18-ին դիմել է նույն ՔԿՀ-ի բուժմաս եւ բժիշկ Մարզպետ Մինասյանի կողմից ստացել համապատասխան բուժում, սակայն հոկտեմբերի 24-ին մահացել է: Քրեական գործի նախաքննության ընթացքում պարզվել էր, որ Սլավիկ Ոսկանյանը մահացել է ՔԿՀ-ի բժիշկ Մարզպետ Մինասյանի կողմից իր մասնագիտական պարտականությունները ոչ պատշաճ կատարելու հետեւանքով: Սակայն այդքանից հետո, 2011թ. օգոստոսի 30-ին Հատուկ քննչական ծառայության ՀԿԳ ավագ քննիչ Գ. Պետրոսյանը որոշում է կայացրել քրեական գործի վարույթը կարճելու եւ քրեական հետապնդում չիրականացնելու մասին:
Նշյալ որոշումը բողոքարկվել է ՀՀ գլխավոր դատախազին: Վերջինիս կողմից
2011թ. դեկտեմբերի 6-ին ստացվել է տուժողի իրավահաջորդի ներկայացուցչի բողոքը մերժելու մասին որոշում: Ոսկանյանի ընտանիքի պնդմամբ՝ տուժողը մահացել է փտախտից (գանգրենա), որի պատճառ է դարձել կալանքի ընթացքում ստացված վերքի վարակումը եւ դրա ոչ պատշաճ բուժումը: Տուժողի իրավահաջորդների հարցադրմանը, թե քննությունը ինչո՞ւ չի պարզվել, թե ինչ հանգամանքներում է Ոսկանյանը ստացել նշված վերքերը, որոնք հանգեցրել են նրա մահվանը, մինչ օրս անպատասխան է մնացել:
Կարդացեք նաև
«Առավոտ» օրաթերթ
